जेनजी प्रदर्शनले रोकिएका सार्वजनिक यातायात सञ्चालन गरिने

समाज

गृहपृष्ठ
समाज

जेनजी प्रदर्शनले रोकिएका सार्वजनिक यातायात सञ्चालन गरिने

क्यापिटल नेपाल आइतबार, भदौ २९, २०८२

काठमाडौं। भदौ २३ र २४ गतेको ‘जेनजी’ प्रदर्शनपछि सिर्जित अवस्थाका कारण रोकिएका सार्वजनिक सवारी साधन देशभर सञ्चालन गरिने भएको छ।

भौतिक पूर्वाधार तथा यातायात मन्त्रालयका सचिव केशवकुमार शर्माको अध्यक्षतामा सिंहदरबारमा बसेको सरोकार भएका निकायको बैठकमा प्रदर्शनका कारण रोकिएका सार्वजनिक सवारी साधनलाई देशव्यापी रूपमा सञ्चालन गर्ने निर्णय गरिएको हो।

बैठकमा प्रदर्शनका कारण एक सातादेखि काठमाडौंसहित विभिन्न स्थानमा रोकिएका सार्वजनिक सवारी साधनलाई देशव्यापी रूपमा सञ्चालन गर्ने निर्णय भएको नेपाल यातायात व्यवसायी राष्ट्रिय महासंघका वरिष्ठ उपाध्यक्ष सरोज सिटौलाले जानकारी दिए।

उनका अनुसार बैठकले ढुवानीका मालवाहक सवारीसाधनलाई सहजीकरण गर्ने निर्णय गरेको छ। दसैँ, तिहार छठ पर्व नजिकिएसँगै घर जाने यात्रुका लागि अग्रिम टिकट बुकिङ खुला गर्न यातायात व्यवस्था विभागका महानिर्देशक राजीव पोखरेलको संयोजकत्वमा यातायात व्यवसायी, मजदुर तथा ट्राफिक प्रहरी रहनेगरी समिति गठन गरिएको महासंघका वरिष्ठ उपाध्यक्ष सिटौलाले बताए।

समितिले सरोकार भएका निकायसँगको सहकार्य र समन्वयमा शीघ्र बैठक बसेर अग्रिम टिकट बुकिङ खुला गर्ने छ। यस वर्ष असोज ६ गते घटस्थापना र १६ गते बडादसैँ परेको छ।

प्रकाशित मिति: आइतबार, भदौ २९, २०८२ १४:३८

प्रतिक्रिया दिनुहोस्