चितवन। पहिरोले दुई राजमार्ग अवरुद्ध भएका छन्।
कर्णाली राजमार्गअन्तर्गत कालीकोटको शुभकालिका गाउँपालिका–१ स्थित गगनेखोलामा गए राती पहिरो खस्दा कर्णाली राजमार्ग र चितवनको इच्छाकामना गाउँपालिका–५ तुइनखोलास्थित सडकखण्डमा पहिरो खसेर नारायणगढ–मुग्लिन सडक खण्ड अवरुद्ध भएको छ।
कर्णाली राजमार्गको गगनेखोला क्षेत्रमा यसअघि पनि पटकपटक पहिरो गई राजमार्ग अवरुद्ध हुँदै आएको थियो। राजमार्गको सबैभन्दा बढी जोखिम ठाउँ पनि हो।
अविरल वर्षाले खसेको पहिरोले राजमार्ग पूर्ण रूपमा अवरुद्ध भएको जुम्ला सडक डिभिजन कार्यालयका प्रमुख दीपेन्द्रकुमार चौधरीले जानकारी दिए। पहिरो पन्छाउन समय लाग्ने भएको छ।
त्यसैगरी मुग्लिन इलाका प्रहरी कार्यालयका प्रहरी निरीक्षक प्रतीक सिंहका अनुसार पहिरोका कारण नारायणगढ–मुग्लिन सडक खण्ड पुनः अवरुद्ध भएको हो। मंगलबार साँझ ८ः५० बजेको समयमा इच्छाकामना गाउँपालिका–५ तुइनखोला स्थित सडक खण्डमा पहिरो खसेर सडक अवरुद्ध भएको हो।
सडक खण्डमा पहिरो पन्छाएर केही सवारीसाधन पार गराएपछि पुनः पहिरो खसेर सडक अबरुद्ध भएको हो।
अहिले एउटा एक्साभेटर प्रयोग गरेर पहिरो पन्छाउने काम भइरहेको छ भने थप लोडर र एक्साभेटर लैजाने तयारी गरिएको छ। प्रहरी निरीक्षक सिंहले पहिरो पन्छाउन कम्तीमा दुई घन्टा लाग्ने जानकारी दिए।
यस्तै, पृथ्वी राजमार्गको घोप्टे भीरमा पनि पहिरोका कारण सडक एकतर्फी भएको छ। नारायणगढ मुग्लिन सडक खण्डकै नाम्सी खोलामा पहिरो खसेको पहिरो पन्छाएर सडक दुईतर्फी सञ्चालन गरिएको छ।
अहिले पनि सो क्षेत्रमा पानी परिरहेको छ। पहिरो खसेपछि गन्तव्यमा हिँडेका सवारीसाधन रोकिएका छन्। पहिरोलाई अहिले हटाउने काम भइरहेको छ। राजमार्ग अवरुद्ध हुँदा यात्रु अलपत्र परेका छन्।
बसमा सवार यात्रुको मृत्यु
नारायणगढ–मुग्लिन सडक खण्डमा बसमा ढुंगा खसेर लाग्दा एक जना यात्रुको मृत्यु भएको छ।
जिल्ला प्रहरी कार्यालयका सूचना अधिकारी प्रहरी नायब उपरीक्षक रवीन्द्र खनालका अनुसार तनहुँबाट नारायणगढतर्फ गइरहेको ग२ख १८३६ नम्बरको बसमा मंगलबार साँझ इच्छाकामना गाउँपालिका–६ नाम्सीखोला पुलमा सडकमाथिबाट ढुंगा खसेर लाग्दा बसमा सवार लमजुङको घलेगाउँकी ४६ वर्षीय ऐश्वर्या कामी गम्भीर घाइते भएकी थिइन्।
घाइते कामीको पुरानो मेडिकल कलेज भरतपुरमा उपचारका क्रममा मृत्यु भएको हो।
बसचालक तनहुँ म्याग्दे गाउँपालिका–२ का ३५ वर्षीय तेजकुमार शाहीलाई प्रहरीले नियन्त्रणमा लिएको छ। घटनाबारे थप अनुन्धान भइरहेको सूचना अधिकारी खनालले बताए।–रासस
