कांग्रेस पदाधिकारी बैठक आज समापन हुँदै, के गर्ला निर्णय?

राजनीति

गृहपृष्ठ
राजनीति

कांग्रेस पदाधिकारी बैठक आज समापन हुँदै, के गर्ला निर्णय?

क्यापिटल नेपाल शनिबार, असोज २५, २०८२

काठमाडौं। नेपाली कांग्रेसको पदाधिकारी र पूर्वपदाधिकारी बैठक लगातार तीन दिनदेखि बसिरहेको छ। शुक्रबार समापन हुने भनिएको बैठकमा पदाधिकारीले बोल्ने क्रम नसकिएपछि आज पनि बोलाइएको हो।

दिउँसो १ बजेबाट पार्टी मुख्यालय सानेपामा बस्ने बैठकले असोज २६ मा बोलाइएको सम्भवतः केन्द्रीय कार्यसमिति बैठकको औपचारिक एजेन्डा टुंगो लगाउने बताइएको छ।

बिहीबार पदाधिकारी र पूर्वपदाधिकारीको मात्रै बैठक बसेकामा शुक्रबार कार्यसम्पादन समिति सदस्यलाई समेत बोलाइएको प्रवक्ता डा. प्रकाशशरण महतले बताए। बैठकमा अहिलेसम्म धारणा राख्ने नेताहरूले पार्टी अधिवेशन, सरकारले घोषणा गरेको निर्वाचन र जेनजी आन्दोलनबारे केन्द्रीय समिति बैठकमा एजेन्डा बनाउने गरी धारणा राखेको उनको भनाइ छ।

कांग्रेसमा सभापति शेरबहादुर देउवा नेतृत्वको कार्यसमितिको चारवर्षे कार्यकाल आगामी मंसिरमा सकिँदै छ। तोकिएको समय मंसिरमै नियमित महाधिवेशन गर्ने एजेन्डा केन्द्रीय समितिमा लैजान पदाधिकारी बैठकमा सुझाव आएको बुझिएको छ।

सुशीला कार्की नेतृत्वको सरकारले आगामी फागुन २१ का लागि घोषणा गरेको प्रतिनिधिसभाको निर्वाचन, जेनजी आन्दोलनपछिको अवस्था, आन्दोलनमा भएको आगजनी र तोडफोड छानबिनको विषय, पार्टी सभापतिले राजीनामा दिने÷नदिनेलगायत विषयमा चर्चा हुने बताइएको छ।

कांग्रेसमा नियमित र विशेष महाधिवेशनको कुरा उठिरहेका बेला आज समापन हुने भनिएको बैठकबाट निष्कर्ष निकालिने सम्भावना छ।

प्रकाशित मिति: शनिबार, असोज २५, २०८२ ०७:१२

प्रतिक्रिया दिनुहोस्