काठमाडौं। युक्रेनको दक्षिणी ओडेसा क्षेत्रका केही भागहरूमा शनिबार बिहानै भएको रुसी आक्रमणले युक्रेनको ऊर्जा प्रणालीमा व्यापक क्षति भएको अधिकारीले बताएका छन्।
अधिकारीले पछिल्लो बिजुली कटौतीले कति मानिसहरूलाई असर गरेको छ भनेर बताएनन्। तर, युक्रेनी ऊर्जा फर्म डिटिइकेले यस क्षेत्रको राजधानीका केही भागमा विद्युत सेवा अवद्ध भएको रिपोर्ट गरेको छ।
डिटिइकेका अनुसार आक्रमणका कारण यस क्षेत्रका दुई लाख ४० हजार भन्दा बढी घरमा विद्युत सेवा अवरूद्ध बनेको छ।
'हिजो रात, दुश्मनले ओडेसा क्षेत्रमा ऊर्जा र नागरिक पूर्वाधारमा आक्रमण गरेका कारण विद्युत सेवा अवरूद्ध भएको छ,' क्षेत्रीय गभर्नर ओलेग किपरले टेलिग्राममा भने।
मस्कोले २०२२ मा आक्रमण गरेदेखि प्रत्येक हिउँदमा युक्रेनको ऊर्जा ग्रिडलाई लक्षित गर्दै आएको छ। विद्युत ग्रिडमा हसने आक्रमणले लाखौँ घरको बिजुली र ताप कटौती गर्दछ र किएभमा पानी आपूर्तिमा बाधा पुर्याउँछ।
किएभले आक्रमणहरू मुख्य रूपमा नागरिकविरुद्ध लक्षित भएको दावी गरे पनि रूसले युक्रेनले लगाएको आरोपको खण्डन गर्दै युक्रेनी सेनाले ऊर्जा स्थल प्रयोग गर्ने गरेको बताएको छ।
ठूलो मात्रामा रुसी आक्रमणका कारण राजधानी किएभ र अन्य नौ क्षेत्रमा बिजुली कटौती भएको भोलिपल्ट शनिबारको अवरोध भएको हो।
डिटिइकेले शनिबार बिहान भनेको छ, 'आक्रमणपछि अवरुद्ध विद्युत सेवा राजधानीका करिब आठ लाखभन्दा बढी घरमा पुनर्स्थापना गरिएको छ।'
युक्रेनका राष्ट्रपति भोलोदिमिर जेलेन्स्कीले शुक्रबारको रुसी आक्रमणलाई ‘शत्रुद्वारा गरेको उच्च क्षति’को संज्ञा दिएका छन्। उनले पश्चिमा देशलाई मस्कोमाथि प्रतिबन्ध बढाउन आग्रह गरेका छन्।
