राजनीतिक दलसँग संवाद नगरी निर्वाचनको वातावरण बन्दैन- अध्यक्ष ओली

राजनीति

गृहपृष्ठ
राजनीति

राजनीतिक दलसँग संवाद नगरी निर्वाचनको वातावरण बन्दैन- अध्यक्ष ओली

क्यापिटल नेपाल शनिबार, कात्तिक १, २०८२

काठमाडौं। नेकपा एमालेका अध्यक्ष केपी शर्मा ओलीले राजनीतिक दलसँग संवाद नगरी निर्वाचनको वातावरण बन्न नसक्ने बताएका छन्।

पार्टी केन्द्रीय कार्यालय, च्यासलमा आज आयोजित सम्पर्क समन्वय कमिटीको भेटघाट तथा चियापान कार्यक्रममा उनले प्रहरीका एक हजार दुई सय हतियार र एक लाखभन्दा बढी गोली लुटिएर बाहिर रहेको तथा साढे पाँच हजार कैदी फरार रहेका अवस्थामा निर्वाचनमा जान कठिन हुने बताए।

“जेनजी भाइबहिनीले भ्रष्टाचारको अन्त्य र सुशासनका लागि राखेका माग जायज छन्, तर त्यसका नाममा हिंसा मच्चाउने तत्वले गरेका अराजक क्रियाकलापको हामी समर्थन गर्न सक्दैनौँ। समाजमा त्रासको वातावरण राखेर सरकार चलाउन वा निर्वाचन गराउनु हुँदैन। हामी लोकतान्त्रिक प्रणालीमा छौँ। हाम्रो सुरक्षा र स्वतन्त्रताको रक्षा राज्यले गर्नुपर्छ। नागरिकले आफ्नो सुरक्षा आफैँ गर्नुपर्ने अवस्था आउनुहुँदैन”, अध्यक्ष ओलीले भने, “हामी कुनै हतियार र कमजोर शक्ति होइनौँ। लोकतन्त्रका लागि लडेर आएका दल हौँ। लोकतन्त्र र शान्ति सुव्यवस्थाको पुनःस्थापना गर्न लाग्नेछौँ। त्यसका लागि एमाले सक्रिय रहने छ।”