सुनसरी। ‘फेसन’ र सांस्कृतिक विविधताको सहर भनेर परिचित धरान तिहारको झिलीमिली उज्यालोमा चम्किएको छ। देशका अन्य सहरमा जस्तै यहाँ पनि हरेक घरघरमा झिलीमिली बत्ती बालिएका छन्।
हरेक सडकका गल्लीमा फूलमालाको सुगन्ध फैलिएको छ। रातीको समयमा बत्तीले शोभा बढाएको देखिन्छ भने दिउँसो बजारको किनमेल र चहलपहलले रौनक थपेको छ। तिहारलाई फूल, रंग र उज्यालोको पर्व मानिन्छ। नेपालीका घरघरमा दियो, बत्ती बाल्ने पुरानै चलन हो। समय बदलिएसँगै पछिल्लो समय माटाको दियो र मैनबत्तीको स्थान आधुनिक बत्तीले लिएको छ।
यसले विद्युतीय बत्तीको माग बढेको छ। माटोका दियो र मैनबत्ती विरलै देख्न पाइन्छ। व्यवसायी सुलिन श्रेष्ठ पनि परम्परागत दियो र मैनबत्ती करिब विस्थापित भइसकेको बताउँछन्। उनी भन्छन्, ‘पहिले पहिले दियो र मैनबत्ती नै बाल्ने चलन थियो, केही समययता विद्युत् र विद्युतीय सामग्रीको पहुँच भएसँगै ती सामान विस्थापित भइसकेका छन्। तिहार सुरु भएसँगै झिलिमिली विद्युतीय बत्तीको बिक्री धेरै हुन्छ। यसबीचमा दैनिक ५० हजारदेखि ६० हजारसम्म बत्ती र सजावटका सामग्री बिक्री हुन्छन्।’
घर, पसल र कार्यालयमा रातभर उज्यालो पार्ने चलन बढेको छ। यसले विद्युतीय बत्तीको व्यापार बढी फस्टाएको छ। हाल रु ३० देखि २० हजारसम्मका फरक फरक ‘डिजाइन’ का बत्ती बजारमा उपलब्ध छन्। श्रेष्ठले भने, ‘हाल धरानका हरेक गल्लीमा झिलीमिली बत्ती टाँगिएको छ, हरेक घरका छतमा झुन्ड्याइएका छन्। यही उज्यालोमा युवायुवती सेल्फी लिँदै गरेको देखिन्छन्।
सामाजिक सञ्जालमा धरानका दृश्य सेयर भइरहेका छन्। देउसीभैलो खेल्ने समूहले घरघरमा पुगेर संगीत र नृत्यको माधुर्य फैलाइरहेका छन्।’
अर्का बत्ती व्यापारी कृष्ण यादव धरानमा हरेक वर्षजसो नयाँ नयाँ स्वरुप र शैलीका बत्तीको माग बढिरहेको बताउँछन्।
उनी भन्छन्, ‘सामाजिक सञ्जालबाट विश्वको अभ्यास हेर्ने मिल्छ, अनि तस्बिर र भिडियो देखाएर यस्तै चाहियो भनेर आउँछन्। यस वर्ष नयाँ डिजाइनका एलइडी स्ट्रिङ, रिमोट कन्ट्रोल बत्ती र नयाँ खालको झिलिमिलीको माग बढेको छ। ग्राहक अब बत्ती मात्र होइन, डिजाइन र रङको मिलान हेरेर तिहारका लागि सामान खरिद गर्छन्। घरको झ्याल, छत र बगैँचासम्म बत्ती सजाउने चलन बढेको छ।’
सुनसरी उद्योग वाणिज्य संघका महासचिव प्रभाव खतिवडा गत वर्षको तुलनामा यस वर्ष तिहारको व्यापारमा वृद्धि भएको बताउँछन्। मिठाई, फूलमाला, झिलिमिली बत्ती र अन्य सजावटका सामग्रीको बिक्री करिब २० प्रतिशतले बढेको अनुमान रहेको उनको भनाइ छ।
‘हरेक घरमा झिलिमिली बत्ती र सजावटको आकर्षण बढेको छ। यसले बजारमा आर्थिक गतिविधि पनि बढेको छ’, उनले भने, ‘फूल, माला, बत्ती र उत्सव मिलनले धरान साँच्चिकै उज्यालो सहर बनेको छ। सांस्कृतिक र आर्थिक दृष्टिले पनि तिहारले धरानलाई नयाँ ऊर्जा र चमक दिएको छ।’–रासस
