प्रतिकूल मौसमले देशभरका उडान प्रभावित, कतिपय विमान ‘डाइभर्ट’

पर्यटन

गृहपृष्ठ
पर्यटन

प्रतिकूल मौसमले देशभरका उडान प्रभावित, कतिपय विमान ‘डाइभर्ट’

क्यापिटल नेपाल बिहीबार, कात्तिक १३, २०८२

काठमाडौं। प्रतिकूल मौसमका कारण मुलुकका हवाई उडानहरू प्रभावित भएका छन्। मौसममा आएको खराबी र ‘इनरुट वेदर’ बिग्रँदा त्रिभुवन अन्तर्राष्ट्रिय विमानस्थलबाट हुने आन्तरिक तथा अन्तर्राष्ट्रिय दुवै उडान प्रभावित भएका हुन्।

विमानस्थलका प्रवक्ता रिञ्जी शेर्पाका अनुसार खराब मौसमका कारण आज आन्तरिकतर्फका केही उडान ‘डाइभर्ट’ हुनका साथै भरतपुर र तुम्लिङटार विमानस्थलको उडान बन्द गरिएको छ। पोखरा विमानस्थलमा आगमन रोकिएको छ भने ‘डिपार्चर’ मात्र सञ्चालनमा छ। काठमाडौंका लागि विराटनगरबाट उडेको श्री एयरलाइन्सको विमान विराटनगरमै डाइभर्ट भएको छ भने भैरहवाबाट उडेको सोही एयरलाइन्सको विमान पनि उतै फर्काइएको प्रवक्ता शेर्पाले बताए।

अन्तर्राष्ट्रिय तर्फ पनि उडानहरू प्रभावित भएका छन्। नेपाल एयरलाइन्स र इण्डिगो एयरका विमानहरू नयाँदिल्ली डाइभर्ट भएका छन् भने एयर इण्डियाको विमान लखनऊ फर्काइएको छ। हाल त्रिभुवन अन्तर्राष्ट्रिय विमानस्थलको भिजिबिलिटी दुई हजार ५०० मिटर रहेको प्रवक्ता शेर्पाले जानकारी दिए। इनरुट वेदरमा समस्या आउँदा आन्तरिक उडानहरू बढी प्रभावित भएको विमानस्थल कार्यालयले जनाएको छ।

यसैबीच, जल तथा मौसम विज्ञान विभागको मौसम पूर्वानुमान महाशाखाका अनुसार बंगालको खाडीमा विकसित चक्रवात ‘मोन्था’ कात्तिक ११ गते राति भारतको आन्ध्र प्रदेशमा प्रवेश गरेको थियो। त्यसपछि उक्त प्रणाली कमजोर हुँदै उत्तर, उत्तर–पश्चिम दिशातर्फ सर्दै नेपाल नजिक आइपुगेको छ।

महाशाखाका अनुसार उक्त प्रणालीको प्रभाव आजदेखि कात्तिक १५ गतेसम्म रहनेछ। यस अवधिमा बाग्मती, मधेस र कोशी प्रदेशमा मध्यमदेखि भारी वर्षा हुने सम्भावना रहेको भन्दै महाशाखाले आवश्यक सर्तकता अपनाउन सबैलाई आग्रह गरेको छ।

प्रकाशित मिति: बिहीबार, कात्तिक १३, २०८२ १२:२१

प्रतिक्रिया दिनुहोस्