जेनजीपछिको अस्थिरतामाझ पूर्वअर्थमन्त्री फोरमको सन्देशः ‘अर्थतन्त्रलाई रोक्न नदिनू’

अर्थतन्त्र

गृहपृष्ठ
अर्थतन्त्र

जेनजीपछिको अस्थिरतामाझ पूर्वअर्थमन्त्री फोरमको सन्देशः ‘अर्थतन्त्रलाई रोक्न नदिनू’

क्यापिटल नेपाल शुक्रबार, कात्तिक १४, २०८२

काठमाडौं। पूर्वअर्थमन्त्री फोरमले आमनागरिक र व्यवसायीलाई विचलित नभई आर्थिकलगायतका नियमित क्रियाकलाप सञ्चालन गर्न आह्वान गरेको छ।

काठमाडौंमा बसेको फोरम बैठकमा अर्थमन्त्री रामेश्वर खनाल पनि उपस्थित थिए। बैठकले भदौ २४ गते जेनजी आन्दोलनको भावनाविपरीत आपराधिक मानसिकता भएका अराजक समूहबाट भएका तोडफोड, लुटपाट र आगजनीका घटनाले आम नागरिक र व्यवसायी जगत्मा परेको आर्थिक तथा मनोवैज्ञानिक प्रभावप्रति गम्भीर ध्यानाकर्षण जनाएको छ।

फोरमका सदस्यसचिव विमल केडियाले जारी विज्ञप्तिमा नागरिक र व्यवसायीलाई हतोत्साहित नहुन आग्रह गर्दै भने, “मनोबल र आर्थिक क्रियाकलाप कमजोर हुन नदिन सरकारले सुरक्षा, राहत र सहुलियतका उपायहरू थप अघि बढाउनुपर्छ।”

बैठकले कर विवरण बुझाउने अवधि र ऋण तथा ब्याज भुक्तानीको समयसीमा १५ दिन थप गर्न सरकारलाई अनुरोध गरेको छ। त्यस्तै, भदौ २४ गतेको घटनामा संलग्न व्यक्तिहरूलाई कानुनी दायरामा ल्याई कारबाहीमा तीव्रता ल्याउन पनि फोरमले माग गरेको छ।

बैठकमा अर्थमन्त्री खनालसहित पूर्वअर्थमन्त्रीहरू प्रकाशचन्द्र लोहनी, सुरेन्द्र पाण्डे, वर्षमान पुन, प्रकाशशरण महत, नेपाल राष्ट्र बैंकका गभर्नर विश्व पौडेल र अर्थसचिव घनश्याम उपाध्याय सहभागी थिए।

प्रकाशित मिति: शुक्रबार, कात्तिक १४, २०८२ २२:००

प्रतिक्रिया दिनुहोस्