बाँके। नेपालगञ्जस्थित राँझा विमानस्थलको सुविधायुक्त नयाँ टर्मिनल भवन निर्धारित समयभन्दा दुई महिना पहिले नै निर्माण भएको छ।
२०७९ पुसबाट काम सुरु गरेको निर्माण कम्पनीले २०८२ पुसमा सक्ने गरी तीन वर्षको समयावधि पाएकामा दुई महिना अगाडि नै निर्माण पूरा गरेको राँझा विमानस्थल टर्मिनल भवन आयोजनाका प्रमुख नलविक्रम थापाले जानकारी दिए।
आयोजनाको काम सम्पन्न भएसँगै केही दिनभित्र निर्माण पक्षबाट हस्तान्तरण हुने र त्यसपछि पनि नागरिक उड्डयन प्राधिकरणको विज्ञ टोलीबाट स्थलगत अनुगमन गरिने उनले बताए। आयोजना प्रमुख थापाले भने, ‘विज्ञले अनुगमन गरेपछि पुरानो टर्मिनल भवनमा रहेको एक्सरे मेसिनलगायत आवश्यक सामान नयाँमा सारेर अबको १५ दिनभित्र नयाँबाट सेवा सुरु हुनेछ। नेपालगञ्जमा निर्मित टर्मिनल भवन अन्तरराष्ट्रिय मापदण्डअनुसार निर्माण गरिएकाले आन्तरिक र बाह्य दुवै उडानका लागि उपयुक्त रहेको छ।’
उनका अनुसार भ्याटबाहेक २ अर्ब ७४ करोड २० लाख १८ हजार ९९३ लागतमा निर्माण कम्पनीले टर्मिनल भवन निर्माण गरेको हो। नवनिर्मित टर्मिनल भवन सेमी बेसमेन्टसहित तीन तलाको छ। यसको बेसमेन्ट कमर्सियल प्रयोजनका लागि निर्माण गरिएको छ, जहाँ कुल २४ वटा पसल रहनेछन्।
५ हजार ७५ स्क्वायर मिटरको क्षेत्रफल ओगटेको टर्मिनल भवनभित्र यात्रु जाँच कक्ष १४, भीआईपी रुम तीन, चिल्ड्रेन प्लेइङ एरिया एउटा, भन्सार र क्वारेन्टाइन जाँचका लागि अलग÷अलग कोठा निर्माण गरिएका छन्।
भविष्यमा अन्तरररष्ट्रिय उडान हुने सम्भावनालाई दृष्टिगत गर्दै घरेलु र अन्तराष्ट्रिय उडानका लागि अलग/अलग यात्रु प्रस्थान र आवागमन ढोका तयार गरिएको छ। नवनिर्मित टर्मिनल भवनको यात्रु क्षमता प्रतिघन्टा ६२८ छ ।
नयाँ टर्मिनल भवनभित्र बगैँचाका साथै पाँचदेखि १४ मिटर फराकिलो बाटो निर्माण गरिएको छ। टर्मिनल भवनको परिसरमा ढल निकास तथा बढी भएको पानी निकासका लागि उचित नालाको विकास गरिएको छ।
नयाँ टर्मिनल भवन क्षेत्रमा एप्रोन अर्थात् जहाज पार्किङ गर्ने ठाउँ पनि निर्माण गरिएको छ। एटिआर–७२ जहाज ३ वटा र ट्वीनअटर जहाज ५ वटा एकै पटकमा पार्किङ गर्न मिल्ने सुविधा रहेको आयोजना प्रमुख थापाको भनाइ छ।–रासस
