सोलुखुम्बु। सोलुखुम्बुको माप्य दूधकोशीका उजिर कार्कीलाई शनिबार अचानक काठमाडौं आउनुपर्ने भयो। जरुरी काम परेपछि उनले विमान टिकटका लागि फाप्लुस्थित नेपाल एयरलाइन्सको कार्यालयमा फोन गरे। तर जवाफ सधैँजस्तै आयो 'टिकट छैन।'
यही छोटो वाक्यले कार्कीको मात्रै होइन, अहिले समग्र तल्लो सोलुखुम्बुका सर्वसाधारणको वास्तविक अवस्था उजागर गरेको छ। कार्कीजस्तै धेरैलाई अत्यावश्यक काम परे पनि ‘सामान्य’ फोन, सामान्य शैली, सामान्य नागरिकको हैसियतमा जहाजको टिकट पाउछ भन्ने विश्वाससमेत गुमिसकेको छ। अन्ततः कार्की काठमाडौं जान सडकमार्ग नै रोज्न बाध्य भए।
‘यो घटना व्यक्तिगत पीडा मात्र होइन। सोलुखुम्बुमा विमान सेवा कति अव्यवस्थित, कति पहुँचवाला व्यक्तिको कब्जामा र कति सर्वसाधारणविरोधी बनिरहेको छ भन्ने कठोर यथार्थ हो।’ सल्लेरीका रश्विन मगरले भने।
अहिले फाप्लु–काठमाडौं उडान चार दिन मात्रै छ। त्यो पनि ‘चिनजान’वाला यात्रुका लागि मात्र हुँदै आएको छ। फाप्लु विमानस्थलमा अहिले हप्तामा नेपाल वायुसेवा कम्पनीले चार दिन (सोमबार, बुधबार, शुक्रबार र शनिबार) उडान भर्दै आएको छ।
निजी क्षेत्रका विमान कम्पनीले व्यस्तता र अनुकुलता नदेखाउँदै फाप्लु–काठमाडौं उडान तालिका नै हटाएपछि सोलुखुम्बुवासी नेपाल एयरलाइन्सकै भर पर्नुपर्ने बाध्यतामा छन्। तर, समस्या यहीँदेखि सुरु हुन्छ ।
नेपाल एयरलाइन्सको एकाधिकारजस्तै भएको यस मार्गमा सर्वसाधारणको पहुँच झन्-झन् सिमित हुँदै गएको छ। फोन गर्नेबित्तिकै सुन्ने उत्तर टिकट सकिसक्यो, सिट खाली छैन, अघिल्लो हप्तादेखि नै बुकिङ छ।
यही एयरलाइन्सले ‘माथिबाट सिफारिस आएपछि भने तुरुन्तै टिकट व्यवस्था गरिदिने सर्वसाधारणको तितो अनुभव छ। सल्लेरीका व्यवसायी महेश अधिकारी भन्छन्, ‘सामान्य मानिसले टिकट माग्यो भने ‘छैन’ भन्छन्, तर ठूला मान्छेले फोन गरेपछि तुरुन्तै टिकट निकालिदिन्छन्। फाप्लुमा अहिले पावर नलागाई एयरलाइन्सको टिकट पाउनु लगभग असम्भवजस्तै भएको छ।’
सोलुखुम्बुबाट सजिलोसँग हवाई टिकट नपाएको गुनासो काठमाडौंको ट्राभल्स एजेन्सीमा समेत आउने गरेको छ। एजेन्सीका एक अधिकारीले भने, ‘टिकट नपाउने पटक पटक गुनासो आएपछि एयरलाइन्सको हेड अफिसमा पनि समस्या टिपाइसकेको छु।’
सोलुखुम्बु पर्यटनको आधारदेखि सगरमाथाको प्रवेशद्वार हो। नेपालकै गौरव हो। तर त्यही जिल्लामा हवाई टिकट जस्तो आधारभूत सेवा पाउन ‘पावर’को आवश्यकता पर्नु, यो केवल प्रशासनिक कमजोरी नभई सरकारले सम्बोधन गर्नैपर्ने गम्भीर नागरिक समस्या हो।
