कञ्चनपुरको हुलाकी सडकः साढे २ वर्षकाे म्याद, साढे आठ वर्षसम्म अधुरै

पूर्वाधार

गृहपृष्ठ
पूर्वाधार

कञ्चनपुरको हुलाकी सडकः साढे २ वर्षकाे म्याद, साढे आठ वर्षसम्म अधुरै

क्यापिटल नेपाल मंगलबार, मंसिर ९, २०८२

कञ्चनपुर। ३० महिनामा निर्माण गरिसक्नुपर्ने समयावधि तोकिएको कञ्चनपुरको हुलाकी साढे आठ वर्ष बितिसक्दा पनि पूरा हुन सकेको छैन। जिल्लाको पुनर्वास नगरपालिकाको डोकेबजारबाट वेदकोट नगरपालिकाको दैजीसम्म ६२ किलोमिटर हुलाकी सडक निर्माणको सुरुआत २०७३ फागुनमा भएको थियो।

तीन चरणमा ठेक्का दिएर थालिएको काम निर्माण कम्पनीको ढिलासुस्तीका कारण पटकपटक म्याद थप गर्दा पनि सम्पन्न हुन नसकेको हो। कुल ६२ किमी सडकमध्ये हालसम्म ५० किमी मात्रै कालोपत्र भएको छ।

हुलाकी राजमार्ग आयोजना कार्यालय धनगढीका प्रमुख मुकुन्दप्रसाद लामिछानेले तीन चरणमध्ये दोस्रो चरणको करिब १२ किमि हुलाकी सडक कालोपत्रे हुन नसकेको बताए।

‘दोस्रो २२ किमिको काममा एक हजार १०० मिटर भारतसँगको सीमा विवादका कारण निर्माण छाडेको हो। सोसहित १२ किमि कालोपत्रे भएको छैन’, उनले भने, ‘२२ किमिको निर्माण अन्तिम चरणमा पुगेको छ।’

त्यसैगरी सोही सडकअन्तर्गत दोदा नदीमा पक्की पुल निर्माणका लागि चालू आवमा २५ करोड बजेट विनियोजन भएको प्रमुख लामिछानेले जानकारी दिए। सडक निर्माणले कञ्चनपुरको दक्षिण क्षेत्रका नागरिकलाई सदरमुकाम महेन्द्रनगर र प्रदेश राजधानीलगायत अन्य जिल्लासम्मको आवागमनमा सहज भएको छ।

‘वर्षौंसम्म हिलो र धुलो खाएर यात्रा गर्नुपरेको छ’, बेलौरीका शिक्षक केशव विष्टले भने, ‘अढाई वर्षमा बनाइसक्नुपर्ने सडक ठेकेदारको लापरबाहीले साढे आठ वर्षसम्म नबन्दा हैरानी खेप्नुपर्यो।-रासस’

प्रकाशित मिति: मंगलबार, मंसिर ९, २०८२ ०७:०३

प्रतिक्रिया दिनुहोस्