६ महिनादेखि केरुङ नाका बन्द, ६०० कन्टेनरका सामान अझै अलपत्र

पूर्वाधार

गृहपृष्ठ
पूर्वाधार

६ महिनादेखि केरुङ नाका बन्द, ६०० कन्टेनरका सामान अझै अलपत्र

क्यापिटल नेपाल सोमबार, मंसिर १५, २०८२

काठमाडौं। असार २४ मा आएको बाढीपहिरोले नेपाल–चीन जोड्ने मितेरी पुल बगाएसँगै नाका बन्द हुँदा अहिलेसम्म ६०० कन्टेनरका सामान नाकामै अलपत्र परेको व्यवसायीले बताएका छन्। विशेषगरी चाडपर्वका लागि ल्याइएका लत्ताकपडा तथा अन्य सामग्री बोकेको कन्टेनर नाकामै अलपत्र परेका हुन्।

व्यवसायीले मुस्ताङको कोरला र सिन्धुपाल्चोकको तातोपानी नाकाबाट केही सामान ल्याए पनि धेरै सामान बोकेका कन्टेनर अझै केरुङ नाकामा रोकिएका छन्। नेपालको कुल व्यापारमा १३ प्रतिशत व्यापार चीनसँग छ। सबैभन्दा धेरै चीनमा रसुवा नाकाबाट निर्यात हुने गरेको छ। नाका बन्द हुँदा आयात निर्यात ठप्प छ।

केरुङ र तातोपानी नाका राम्रोसँग सञ्चालन नहुँदा केही व्यवसायीले महँगो ढुवानी तिरेर मुस्ताङको कोरोला नाका हुँदै सामान आयात गरिरहेको राष्ट्रिय व्यवसायी महासंघ अध्यक्ष मनोजबाबु श्रेष्ठले बताए। तातोपानी नाकाबाट सामान्य मात्रै कन्टेनर आउजाउ अनुमति हुँदा गाह्रो भइरहेको उनको भनाइ छ। वर्षाका कारण अरनिको राजमार्ग बन्द हुँदा रोकिएको उक्त नाका तिहारपछि मात्र सञ्चालनमा आएको हो।

असार बाढीपछि रसुवाको मितेरी पुल बगाएसँगै आयातनिर्यात ठप्प हुँदा पाँच महिनामा १८ अर्ब बराबरको राजस्व गुमेको रसुवा भन्सार कार्यालयले जनाएको छ। ६ महिनादेखि नाका बन्द भई आयात निर्यात ठप्प हुँदा राजस्व संकलनसमेत बन्द रहेको कार्यालय प्रमुख भन्सार अधिकृत तुलसीप्रसाद भट्टराईले बताए।

चालु आर्थिक वर्ष २०८२/८३ मा रसुवा नाकाबाट ४० अर्ब १६ करोड रुपियाँ राजस्व संकलनको लक्ष्य राखिएको थियो। तर, असार अन्तिम सातादेखि आयात निर्यात बन्द हुँदा लक्ष्यअनुसार राजस्व संकलन ठप्प छ।

मितेरी पुल निर्माण नभएसम्म आयात निर्यात नियमित हुन सक्ने अवस्था छैन। चिनियाँ पक्षले नाकामा बेलीब्रिज निर्माण गरिरहेकाले आगामी डिसेम्बर पहिलो सातासम्म प्राविधिक परीक्षण गरिने अनौपचारिक जानकारी गराएको उनले बताए।

प्रकाशित मिति: सोमबार, मंसिर १५, २०८२ ०९:३०

प्रतिक्रिया दिनुहोस्