‘हामी निर्वाचन गराएर नयाँ सरकारलाई सत्ता हस्तान्तरण गर्न आतुर छौं’

राजनीति

गृहपृष्ठ
राजनीति

‘हामी निर्वाचन गराएर नयाँ सरकारलाई सत्ता हस्तान्तरण गर्न आतुर छौं’

क्यापिटल नेपाल शुक्रबार, मंसिर १९, २०८२

काठमाडौं। प्रधानमन्त्रीको सरकारी निवास बालुवाटारमा शुक्रबार साँझ बसेको सर्वपक्षीय बैठक सम्पन्न भएको छ। प्रधानमन्त्री सुशीला कार्कीले आसन्न निर्वाचनको तयारीका लागि निर्वाचन आयोग, सुरक्षा निकायका प्रमुखहरू र विभिन्न राजनीतिक दलका प्रतिनिधिसहितको उपस्थितिमा बैठक आह्वान गरेकी थिइन्।

छलफलमा सहभागी नेताहरूका अनुसार सबै पक्षले आ–आफ्नो तयारीबारे जानकारी गराएका थिए। नेपाली कम्युनिस्ट पार्टीका नेता प्रकाश ज्वालाले दलका प्रतिनिधिहरूले सरकारलाई प्रष्ट रूपमा निर्वाचनमा मात्रै केन्द्रित हुन आग्रह गरे।

नेता ज्वालाले भने, "राजनीतिक दलहरूले सरकारलाई प्रष्ट रूपमा, यो चुनावी सरकार हो। चुनावमै अर्जुनदृष्टि लगाउनुपर्‍यो। यो सरकारले यताउता ध्यान दिने काम गर्न भएन। चुनावमा केन्द्रित होस्। शान्तिसुरक्षाको वातावरण अझै बनाउनेगरी अघि बढोस् भन्ने सुझाव दिएका छौं।"

केही दलहरूले केही आशंकाहरू व्यक्त गरे पनि निर्वाचनमा जान तत्पर रहेको जानकारी गराएका थिए। सो क्रममा प्रधानमन्त्री कार्कीले निर्वाचनका लागि सहयोग गर्न तयार रहेको बताइन्।