नागरिक उड्डयन प्राधिकरणको निमित्त महानिर्देशक बने देवचन्द्रलाल

पर्यटन

गृहपृष्ठ
पर्यटन

नागरिक उड्डयन प्राधिकरणको निमित्त महानिर्देशक बने देवचन्द्रलाल

क्यापिटल नेपाल शुक्रबार, पुस ४, २०८२

काठमाडौं। नेपाल नागरिक उड्डयन प्राधिकरणको निमित्त महानिर्देशकमा देवचन्द्रलाल कर्ण नियुक्त भएका छन्।

संस्कृति, पर्यटन तथा नागरिक उड्डयन मन्त्री अनिलकुमार सिन्हाले कर्णलाई निमित्त महानिर्देशकमा नियुक्त गरेको हो।

प्राधिकरणका निमित्त महानिर्देशक प्रदिप अधिकारीलाई भ्रष्टचारको मुद्दा लागेपछि निलम्बनमा परेका थिए।

रिक्त रहेको महानिर्देशक पदमा प्राधिकरणको सिनियर कर्मचारीको तर्फबाट कर्णलाई नियुक्त गरेको हो। निमित्त महानिर्देशक कर्णले शुक्रबार कार्यभार सम्हालिसकेका छन्।

निलम्बित महानिर्देशक अधिकारीको कार्यकाल आगामी माघ १७ गतेसम्म छ। अदालतबाट दोषी ठहर नभएका कारणले माघ १७ सम्म नयाँ नियुक्ति गर्न नमिल्ने भएकाले कर्णलाई निमित्त महानिर्देशकको जिम्मेवारी दिइएको हो।

यसअघि पर्यटन मन्त्रालयका सहसचिव मुकेश ढंगोललाई पनि निमित्त महानिर्देशकको जिम्मेवारी दिइएको थियो। तर, प्राधिकरणकै कर्मचारी योग्य हुँदाहुँदै पर्यटनबाट कर्मचारी पठाउँदा काम गर्न असहज भएको ठहर गर्दै पर्यटन मन्त्री सिन्हाले मन्त्रिस्तरीय निर्णय गर्दै कर्णलाई निमित्त महानिर्देशकको जिम्मेवारी दिइएको जनाएको छ।

माघ १७ गतेपछि पुनः महानिर्देशकमा नयाँ व्यक्तिलाई जिम्मेवारी दिने वा निमित्तको जिम्मेवारी पाएका कर्णलाई निरन्तरता दिइन्छ वा दिइँदैन भन्ने यकिन हुन सकेको छैन।

प्रकाशित मिति: शुक्रबार, पुस ४, २०८२ १५:५३

प्रतिक्रिया दिनुहोस्