काठमाडाैं। एक दशकअघि सम्म गुमनाम रहेको बेलढुंगा अहिले पर्यटकीय गन्तव्यका रुपमा परिचित भइसकेको छ। प्राकृतिक दृश्यावलोकन स्तम्भका रुपमा चिनिएको बागलुङ र म्याग्दीको सिमानामा रहेको बेलढुंगामा पुग्ने पर्यटकको रोजाइ आँखै अघिको हिमाल पर्न जान्छ।
पहिचान, प्रचार र प्रवर्द्धनसहित स्थानीय जागरुक बनेर बेलढुंगाले चर्चा बटुल्न थालेपछि त्यहाँ पुग्ने आन्तरिक पर्यटकको रोजाइमा पर्न थालेको छ। बागलुङको काठेखोला गाउँपालिका–३ धम्जा ओखले र म्याग्दीको बेनी नगरपालिका–३ भकिम्ली सिमानामा अवस्थित बेलढुंगामा पुग्ने पर्यटकको रोजाइमा हिमाल पर्ने गरेको छ।
बेलढुंगाबाट सम्मुखमै दर्जनाैँ हिमालको सुन्दर दृश्यले त्यहाँ पुग्ने पर्यटकलाई मोहित बनाउने गरेको छ। बेलको जस्तै आकृतिमा रहेको अग्लो ढुंगालाई परम्पराकालदेखि बेलढुंगा भनिँदै आएको थियो। उक्त स्थानमा अहिले रेलिङ सहितको फराकिलो पूर्वाधार निर्माण भएको थियो।
नाम सुन्दै आएको मैले आँखैअघि बेलढुंगाबाट हिमाल हेर्न पाउँदा मोहित भएको बागलुङ–९ तित्याङका लालबहादुर थापाले जानकारी दिए। बेलढुंगाबाट आँखै अगाडि देखिने दर्जन बढी हिमशृङ्खला, हराभरा वनजङ्गलको मनोरम दृश्य यसको प्रमुख आकर्षणको केन्द्र रहेको थापाको भनाइ छ।
समुद्री सतहदेखि दुई हजार ६१४ मिटरको उचाइमा रहेको बेलढुंगा आफैँमा मनोरम प्राकृतिक सुन्दरताले भरिपूर्ण ठाउँ रहेको उनको भनाइ रहेको छ। यहाँबाट नेपालमै एकै पटक धेरै हिमाल देखिने मध्यको ठाउँमा पर्ने स्थानीय गोपाल श्रीसको भनाइ छ। श्रीसका अनुसार रुकुमको पुथा हिमालदेखि धौलागिरि, अन्नपूर्ण, माछापुच्छ्रे, मनास्लुदेखि रसुवाको लाङटाङसम्मको हिमाल देख्न सकिने श्रीसको भनाइ छ।
बेलढुंगाको केही तल देउरालीसम्म मोटरबाटोको पहुँच पुगेको छ। देउराली धुरीबाटबाट झन्डै एक किलोमिटर पदमार्गमार्फत करिब १० मिनेटको यात्रामा बेलढुंगा पुगिन्छ। ‘एकै पटकमा दर्जन हिमाल आँखैअघि देख्ने नेपालका कम स्थानमध्ये बेलढुंगा हो, अहिले यहाँ पूर्वाधारले गति लिएको छ, देउरालीमा सडक पुगेको छभने खानेपानी ल्याउने प्रयास थालिएको छ’, श्रीसले भने, ‘बेलढुंगा घरबासमा बसेका पर्यटक बिहान हिमाल हेर्न बेलढुंगा पुग्ने गर्दछन्, चैत वैशाखमा त लागीगुराँसले ढकमक्क हुन्छ बेलढुंगा गाउँ।’
बेलढुंगाभन्दा केही तल म्याग्दीको धार्मिक पर्यटकीय स्थल स्वर्गाश्रमसमेत रहेको छ। धार्मिक आस्थाका कारण स्वर्गाश्रम पुग्ने संख्या पनि अधिक छ। गण्डकी प्रदेश सरकारले बेलढुङ्गा हुँदै पञ्चकोट जोड्ने पदमार्ग निर्माणका लागिसमेत लगानी गरिरहेको छ। काठेखोला गाउँपालिका र गण्डकी प्रदेश सरकारले बेलढुंगा पुग्ने पदमार्ग सहितका अन्य पूर्वाधार निर्माणमा रु ४० लाख लगानी भइसकेको छ भने चालु आर्थिक वर्षमा रु १० लाख बजेट साइकलल्यान्ड बनाउन र कान्छो धौलागिरिको प्रचार गर्न विनियोजन गरिएको छ।
