सुदूरपश्चिम। सुदूरपश्चिम प्रदेशको दोस्रो पञ्चवर्षीय योजनामा लगानीमैत्री आर्थिक वृद्धि र वित्तीय सुदृढीकरणको पाटोलाई प्राथमिकता दिनुपर्नेमा जोड दिइएको छ।
प्रदेश सरकारले तयार पारेको दोस्रो पञ्चवर्षीय योजनाको मस्यौदामाथि आज धनगढीमा भएको छलफलमा सहभागीले शिक्षा सुधार, सीप विकास, अनुसन्धान तथा नवप्रवर्तन प्रवर्द्धन, स्वास्थ्य सेवाको पहुँच विस्तार र मानव विकास सुदृढीकरणलाई योजनाको प्रमुख अङ्ग बनाउनुपर्ने सुझाव दिएका थिए।
यस्तै, समावेशी सामाजिक विकास, सामाजिक न्याय, महिला, बालबालिका, दलित, अपाङ्गता भएका व्यक्ति तथा पिछडिएका समुदायको सशक्तीकरणलाई पनि योजनामा समेट्नुपर्ने सुझाव दिइएको छ।
सुशासन, पारदर्शिता, संस्थागत क्षमता विकासका साथै सङ्घ, प्रदेश, र स्थानीय तहबीच समन्वय तथा सहकार्यलाई मजबुत बनाउनुपर्ने, कृषि, पशुपालन तथा ग्रामीण अर्थतन्त्रको रूपान्तरण, उद्योग तथा उद्यमशीलता प्रवर्द्धनमार्फत रोजगारी सिर्जना, पर्यटन विकास र प्रदेशलाई आकर्षक गन्तव्यका रूपमा स्थापित गर्नुपर्नेमा पनि सहभागीले जोड दिएका छन्।
कार्यक्रममा प्रदेश नीति तथा योजना आयोगका अध्यक्ष एवं मुख्यमन्त्री कमलबहादुर शाहले दीर्घकालीन लक्ष्य प्राप्तिलाई केन्द्रमा राखेर योजना अघि बढाउनुपर्ने आवश्यकता औँल्याए। उनले प्रदेशको समग्र विकासका लागि स्पष्ट दृष्टिकोण, दिगो नीति र परिणाममुखी कार्यक्रम अपरिहार्य रहेकामा जोड दिए।
प्रदेश नीति तथा योजना आयोगकी उपाध्यक्ष डा जीवन रानाले दोस्रो पञ्चवर्षीय योजनाको मस्यौदा, योजनाको पृष्ठभूमि, आवश्यकता र प्राथमिकतामाथि प्रकाश पारेका थिए। उनले प्रदेशको सामाजिक, आर्थिक तथा भौगोलिक विशेषतालाई ध्यानमा राख्दै तयार पारिएको योजनाको मस्यौदामा प्रदेशको विकास यात्रालाई व्यवस्थित, समावेशी र दिगो बनाउने लक्ष्यका साथ विभिन्न क्षेत्रलाई समेटिएको बताए।
पञ्चवर्षीय योजनाको मस्यौदा निर्माण टोलीका डा हेमराज लामिछानेले अवधारणापत्र प्रस्तुत गरे। कार्यक्रममा प्रदेश सरकारका मन्त्री, प्रमुख सचिव, सचिव, मन्त्री, नीति निर्माता, विज्ञ तथा सरोकार भएकाहरूको सहभागिता रहेको थियो।
-1767604954.JPG)
