एसएमसी एपमार्फत १२ करोड ठगी, चिनियाँसहित ११ जना पक्राउ

समाज

गृहपृष्ठ
समाज

एसएमसी एपमार्फत १२ करोड ठगी, चिनियाँसहित ११ जना पक्राउ

क्यापिटल नेपाल सोमबार, पुस २१, २०८२

काठमाडौं। नेपाल प्रहरीले एसएमसी एप्लिकेशन प्रयोग गरी अनलाइन ठगी गरेको आरोपमा चिनियाँसहित ११ जनालाई पक्राउ गरेको छ। एसएमसी एपमार्फत सर्वसाधारणलाई झुक्याई करोडौँ ठगी गरिएको प्रारम्भिक अनुसन्धानबाट खुलेको प्रहरीले जनाएको छ।

प्रहरीका अनुसार चितवन खैरहनी नगरपालिका ६ मा कार्यालय स्थापना गरी कम्पनीको आवरणमा ठगीको गतिविधि सञ्चालन गरिएको थियो। कम्पनी दर्ता प्रमाणपत्र देखाएर यो पूर्ण रूपमा कानुनी काम हो भन्ने भ्रम फैलाइएको र सर्वसाधारणलाई एपमा आबद्ध गराइएको थियो।

उनीहरूले विश्वप्रसिद्ध चलचित्र कम्पनीहरूसँग सहकार्य रहेको दाबी गर्दै चलचित्रको प्रचार सामग्री हेरेबापत आम्दानी हुने झुटो आश्वासन दिएको प्रहरीले जनाएको छ।

एपमा आबद्ध व्यक्तिलाई तीन तहमा विभाजन गरी नयाँ सदस्य भर्ना गरेबापत आकर्षक कमिसन दिने प्रलोभन देखाइएको थियो। तर, कुनै वास्तविक व्यापारिक गतिविधि नगरी नयाँ सदस्यबाट उठाइएको रकम पुराना सदस्यलाई बाँड्ने ‘पोन्जी’ प्रणाली अपनाइएको खुलेको छ। हालसम्म उनीहरूले १२ करोड ८ लाख रुपैयाँभन्दा बढी रकम ठगी गरेको प्रहरीको भनाइ छ।

नेपाल प्रहरी प्रधान कार्यालयअन्तर्गत साइबर ब्यूरोबाट खटिएको टोलीले काठमाडौं, चितवनलगायत विभिन्न स्थानबाट उनीहरूलाई पक्राउ गरेको हो। पक्राउ परेकामध्ये एक जना चिनियाँ नागरिक रहेका छन्।

उनीहरूमाथि विद्युतीय माध्यमबाट ठगी तथा संगठित अपराधसम्बन्धी कसुरमा काठमाडौं जिल्ला अदालतबाट म्याद थप गरी थप अनुसन्धान भइरहेको प्रहरीले जनाएको छ।

प्रकाशित मिति: सोमबार, पुस २१, २०८२ १८:४३