पोखरा र समृद्धि फाइनान्सले बोलाए साधारणसभा, मर्जरलाई अन्तिम रुप दिने

बैंकिङ

गृहपृष्ठ
बैंकिङ

पोखरा र समृद्धि फाइनान्सले बोलाए साधारणसभा, मर्जरलाई अन्तिम रुप दिने

क्यापिटल नेपाल मंगलबार, पुस २२, २०८२

काठमाडौं। समृद्धि फाइनान्स र पोखरा फाइनान्स कम्पनीले माघ १४ मा बस्ने गरी वार्षिक साधारणसभा बोलाएका छन्। समृद्धिको २४औंं साधारणसभा हेटौंडामा र पोखरा फाइनान्सको २८औं र २९औं वार्षिक साधारणसभा पोखरामा बस्ने भएको हो।

समृद्धिले गत आर्थिक वर्षको वित्तीय विवरण पारित गरी चालू आवका लागि लेखापरीक्षक नियुक्ति गर्ने र सञ्चालकको नियुक्ति अनुमोदनको प्रस्ताव पारित गर्नेछ। पोखरा फाइनान्सले गत दुई आवका वित्तीय विवरण पारित गरी चालू आवको लागि लेखापरीक्षक नियुक्ति र सर्वसाधारण समूहबाट सञ्चालक समितिमा मनोनीत सञ्चालकको नियुक्ति अनुमोदन गर्नेछ।

दुवै कम्पनी एकापसमा १ः१ को सेयर अनुपातमा मर्जर प्रस्ताव पारित गर्ने, मर्जरपछि सेयर संरचना परिवर्तन हुने भएकाले प्रबन्धपत्र तथा नियमावलीमा आवश्यक संशोधन गर्ने, राष्ट्र बैंकबाट अन्तिम स्वीकृति लिई पोखरा फाइनान्स लिमिटेडको नामबाट एकीकृत कारोबार गर्ने, मर्जरपछि गठन हुने सञ्चालक समितिमा संस्थाबाट सञ्चालकको प्रतिनिधित्व गर्ने सञ्चालकको नाम पारित गर्ने र थप आवश्यक कार्य गर्न सञ्चालक समितिलाई अख्तियारी दिने प्रस्ताव रहेका छन्।

साधारणसभा प्रयोजनार्थ दुवै कम्पनीले पुस ३० गते बुक क्लोज गर्ने निर्णय गरेका छन्।

प्रकाशित मिति: मंगलबार, पुस २२, २०८२ ११:२३