त्रिशूली किनारमा भेटियो बसको टुक्रा, गत वर्ष बेपत्ता डिलक्स बस भएको आशंका

समाज

गृहपृष्ठ
समाज

त्रिशूली किनारमा भेटियो बसको टुक्रा, गत वर्ष बेपत्ता डिलक्स बस भएको आशंका

क्यापिटल नेपाल आइतबार, पुस २७, २०८२

काठमाडाैं। चितवनको भरतपुर महानगरपालिका–२९ स्थित सिमलताल दुर्घटनास्थल नजिकै बसको एउटा टुक्रा फेला परेको छ। त्रिशूली नदीको तनहुँतर्फको बगरमा बालुवाले पुरिएको अवस्थामा निलो रङको बसको अवशेष भेटिएको हो।

साे अवशेष गत वर्ष असार २८ गते सिमलतालबाट त्रिशूली नदीमा खसेर बेपत्ता भएका दुईवटा डिलक्स बसमध्ये एउटाको हुनसक्ने आशंका गरिएको छ।

जिल्ला प्रहरी कार्यालय चितवनका अनुसार फेला परेको अवशेषबारे यकिन गर्न प्रहरी टोली खटिएको छ। २०८१ साल असार २८ गते बागमती प्रदेश–०३–००१ ख २४९५ नम्बरको गणपति डिलक्स र बागमती प्रदेश–०३–००६ ख १५१६ नम्बरको एन्जल डिलक्स बस लेदोसहितको पहिरोले बगाएर त्रिशूलीमा बेपत्ता भएका थिए। उक्त दुर्घटनामा बसमा सवार २५ जनाको शव भेटिए पनि ४० जना अझै बेपत्ता रहेका छन्।

दुर्घटना भएको डेढ वर्षपछि नदी किनारको बालुवामा बसको टुक्रा भेटिनुलाई हराइरहेका बसहरूको खोजी कार्यमा महत्त्वपूर्ण मोडका रूपमा हेरिएको छ। प्रहरीले उक्त भाग कुन बसको हो र त्यहाँ थप अवशेषहरू छन् कि छैनन् भन्नेबारे अनुसन्धान अघि बढाएको छ।