६ महिनामा वीरगञ्ज हुँदै १२ अर्बको खाद्यवस्तु भित्रियो, सबैभन्दा धेरै धान आयात

अर्थतन्त्र

गृहपृष्ठ
अर्थतन्त्र

६ महिनामा वीरगञ्ज हुँदै १२ अर्बको खाद्यवस्तु भित्रियो, सबैभन्दा धेरै धान आयात

क्यापिटल नेपाल शनिबार, माघ १७, २०८२

वीरगञ्ज (पर्सा। वीरगञ्ज हुँदै चालू आर्थिक वर्षको ६ महिनामा ११ अर्ब ५७ करोड मूल्यका १६ थरीका खाद्यवस्तु आयात भएको छ। गत आर्थिक वर्षको ६ महिनाको तुलनामा चालू आवको सो अवधिमा भने यो नाका हुँदै हुने खाद्य पदार्थको आयातमा २१ करोड मूल्यको गिरावट आएको छ।

वीरगञ्ज भन्सार कार्यालयका सूचना अधिकारी उदयसिंह विष्टले गत आवको छ महिनाको तुलनामा चालू आवको सोही समयमा खाद्य पदार्थ आयातमा सामान्य गिरावट आएको बताए।

जबकि गत आवको ६ महिनामा भने ११ अर्ब ७८ करोड मूल्य पर्ने १६ थरीका खाद्य पदार्थ आयात भएको थियो। चालू आवको ६ महिनामा ५ अर्ब ६८ करोड मूल्य पर्ने १५ करोड ४३ लाख किलोग्राम धान आयात भएको छ। जबकि गत आवको सोही अवधिमा भने ६ अर्ब ९ करोड मूल्यको धान आयात भएको थियो।

चालू आवको ६ महिनामा तीन अर्ब ४१ करोड मूल्य पर्ने मकै आयात भएको छ। त्यस्तै चालू आवको ६ महिनामा एक अर्ब ६१ करोड मूल्य पर्ने चामल र ३३ करोड मूल्य पर्ने माल्ट आयात भएको छ। त्यस्तै २३ करोड ७३ लाख मूल्य पर्ने फापर, कोदो र अन्य खाद्यान्न आयात भएको छ।–रासस

प्रकाशित मिति: शनिबार, माघ १७, २०८२ ०६:२३