नक्कली नोटसँग साटिँदै ‘भोटः’ २५ लाख नक्कली नोटसहित १० जनाको गिरोह भारतमा पक्राउ

राजनीति

गृहपृष्ठ
राजनीति

नक्कली नोटसँग साटिँदै ‘भोटः’ २५ लाख नक्कली नोटसहित १० जनाको गिरोह भारतमा पक्राउ

क्यापिटल नेपाल मंगलबार, माघ २०, २०८२

काठमाडौं। फागुन २१ को निर्वाचन नजिकिँदै गर्दा भ्रष्टाचार गरेर आर्जित रकमसहित वैध/अवैध कारोबार आर्जित रकमको खोलो बगाइँदै छ। आमनिर्वाचनलाई लक्षित गरी नेपालमा नक्कली नेपाली तथा भारतीय रुपैयाँ भित्र्याउने तयारीमा रहेको अन्तर्राष्ट्रिय गिरोह भारतमा पक्राउ परेपछि नक्कली नोट दिएर मतदाता खरिद गर्न लागिएको हो।

नेपाल–भारत सीमा क्षेत्रअन्तर्गत रक्सौल आसपास सक्रिय गिरोहलाई भारतीय प्रहरीले नियन्त्रणमा लिएको हो।

पूर्वी चम्पारण प्रहरी र विशेष कार्यबल (एसटिएफ) को संयुक्त टोलीले भारतको सीतामढी जिल्लाको मेजरगञ्ज क्षेत्रमा सञ्चालनमा रहेको नक्कली नोट छाप्ने अत्याधुनिक कारखाना फेला परेको छ।

छापामारीका क्रममा २५ लाख रुपैयाँ बराबरका नक्कली नेपाली नोट, १८ हजार ५ सय नक्कली भारु तथा नोट छाप्न प्रयोग गरिने हाइटेक मेसिन बरामद गरिएको भारतीय प्रहरीले जनाएको छ। साथै नक्कली नोट छाप्न प्रयोग हुने कागज, रसायन र अन्य सामग्रीसमेत जफत गरिएको छ।

घटनामा संलग्न १० जना अभियुक्त पक्राउ परेका छन्, जसमध्ये ३ जना नेपाली नागरिक रहेको खुलेको छ। प्रारम्भिक अनुसन्धानअनुसार बरामद नक्कली नेपाली रुपैयाँ नेपालमा फागुन २१ गते हुने निर्वाचनलाई लक्षित गरी प्रयोग गर्ने योजना बनाइएको पाइएको छ।

गिरोहले सीमावर्ती क्षेत्र प्रयोग गर्दै नक्कली नोट नेपाल भित्र्याउने तयारी गरिरहेको अवस्थामा छापामारी गरिएको हो। सो क्रममा तीनवटा मोटरसाइकल र एउटा कारसमेत बरामद गरिएको छ। सुरक्षा निकायले गिरोहका अन्य सदस्य तथा मुख्य योजनाकारको खोजी तीव्र बनाएको जनाएको छ।

प्रकाशित मिति: मंगलबार, माघ २०, २०८२ ०८:१५