आईसीसी टी–२० विश्वकपः पाकिस्तान भारतसँग भिड्न तयार, पीसीबीले वहिष्कार निर्णय फिर्ता लियाे

समाज

गृहपृष्ठ
समाज

आईसीसी टी–२० विश्वकपः पाकिस्तान भारतसँग भिड्न तयार, पीसीबीले वहिष्कार निर्णय फिर्ता लियाे

क्यापिटल नेपाल मंगलबार, माघ २७, २०८२

फाइल तस्बिर

काठमाडौं। भारत र पाकिस्तानबीच आगामी फेब्रुअरी १५ मा श्रीलंकाको कोलम्बोमा हुने आईसीसी टी–२० विश्वकप २०२६ अन्तर्गत समूह चरणको खेलमा पाकिस्तानले भारतसँग खेल्ने निर्णय गरेको छ। यसअघि भारतसँगको खेल वहिष्कार गर्ने अडान राखेको पाकिस्तानले अन्तर्राष्ट्रिय समुदाय र क्रिकेट क्षेत्रको आग्रहपछि निर्णय फिर्ता लिइएको घोषणा गरेको हो।

पाकिस्तान सरकारले सामाजिक सञ्जाल ’एक्स’मार्फत मैत्रीपूर्ण देशहरूको अनुरोध र पछिल्लो समयमा भएका सहमतिलाई ध्यानमा राख्दै टोलीलाई भारतविरुद्ध मैदान उत्रन अनुमति दिएको जानकारी दिएको छ।

पाकिस्तान क्रिकेट बोर्ड (पीसीबी) का अध्यक्ष मोहसिन नक्वीले आईसीसी र बंगलादेश क्रिकेट बोर्ड (बीसीबी) सँग भएको छलफलको निष्कर्षबारे प्रधानमन्त्री शहबाज शरिफलाई जानकारी गराएका थिए।

श्रीलंकाका राष्ट्रपति अनुरकुमार दिशानायकेले पाकिस्तानी प्रधानमन्त्री शरिफलाई टेलिफोन गरी क्रिकेटको गतिरोध अन्त्य गर्न र सकारात्मक निर्णय लिन आग्रह गरेका थिए।

बंगलादेश (बीसीबी), श्रीलंका र संयुक्त अरब इमिरेट्स (यूएई) लगायतका सदस्य राष्ट्रले पाकिस्तानलाई नेतृत्वदायी भूमिका खेल्न र खेल सुचारु गर्न औपचारिक पत्राचार गरेका थिए।

बंगलादेश क्रिकेट बोर्डका अध्यक्ष अमिन उल इस्लामले पाकिस्तानको यो सकारात्मक कदमप्रति आभार प्रकट गरेका छन्। पाकिस्तानले पनि बंगलादेशको अनुरोधलाई सम्मान गर्दै आफू सदैव साथ रहने प्रतिबद्धता जनाएको छ।
यसअघि सुरक्षा र राजनीतिक कारण देखाउँदै पाकिस्तानले भारतसँग खेल्न अस्वीकार गर्दै आएको थियो भने बंगलादेशले भारतमा हुने खेल श्रीलंकामा सार्न आग्रह गरे पनि आईसीसीले नमानेपछि वहिष्कार गरेको छ।

प्रकाशित मिति: मंगलबार, माघ २७, २०८२ ०७:२३