चितवन। जिल्लामा पालिएका कुखुरामा इकोलाईको समस्या देखिएको छ। राष्ट्रिय पक्षीरोग अन्वेषण प्रयोगशालामा चालू आर्थिक वर्षको साउनयता ४३२ वटा कुखुराको परीक्षण गर्दा सबैभन्दा धेरै इकोलाई समस्या देखिएको हो।
कार्यालयका प्रमुख डा. विजयकुमार श्रेष्ठका अनुसार परीक्षण गरिएका कुखुरामध्ये ६२ प्रतिशतमा यो रोगको समस्या देखिएको छ। उनका अनुसार मरेको कुखुराको कलेजोको नमुना परीक्षण गर्दा यो रोगको समस्या पहिचान भएको हो। उनका अनुसार दूषित पानीको प्रयोगले यो रोगको समस्या बढी देखिने गर्दछ।
यससँगै पाँच प्रतिशत कुखुरमा साल्मोनेला रोगको संक्रमण देखिएको छ। यो रोग दूषित सामग्री प्रयोग, दाना र पानीको लसपसबाट सर्न सक्ने उनको भनाइ छ। व्यावासयिक रुपमा कुखुरापालन गर्ने किसानहरुले खानपानमा ध्यान नदिँदा यो रोगको सङ्क्रमण देखिएको हुनसक्ने प्रमुख श्रेष्ठले बताए।
कार्यालयले गरेको परीक्षणका क्रममा एभिएन इन्फ्लुन्जा, रानीखेत, गम्बारो, इन्फेक्सीयस ब्रोंगकाइटिस, चिकेन एनिमियाजस्ता रोगको संक्रमण कुखुरामा देखिएको उनले जानकारी दिए।
कुल ९४ वटा कुखुराको परीक्षणका क्रममा १४ वटामा एभिएन इन्फ्लुन्जा, ३५ कुखुरा परीक्षणमा ६ वटामा रानी खेत, ५३ कुखुरा परीक्षणमा २६ वटामा गम्बारो रोगको सङ्क्रमण देखिएको उनले बताए। १८ वटा कुखुरामा इन्फेक्सीयस ब्रोंगकाइटिस परीक्षण गर्दा एउटामा र ९२ वटा कुखुरामा चिकन एनिमिया परीक्षणमा ३० वटामा यो रोगको संक्रमण देखिएको हो। चिकन एनिमिया इलाइजा प्रविधिबाट परीक्षण गर्ने गरिन्छ।
रानीखेत र गम्बारो भाइरसका कारण लाग्ने रोग हो। दुवै रोग जैविक सुरक्षा नअपनाउँदा लाग्ने रोग भएकाले कृषकले जैविक सुरक्षाको विधि अपनाउनुपर्ने उनले बताए। कार्यालयले कुखुराको परीक्षण पिसीआर विधिबाट सुरु गरेको छ।
कुखुराको र्यालबाट एभिएन इन्फ्लुन्जा परीक्षण गर्ने गरिन्छ। यस प्रविधिबाट १४ वटा कुखुराको परीक्षण गरिएको उनले जानकारी दिए। यो परीक्षणबाट बर्डफ्लूजस्ता रोग पत्ता लगाउन सहज हुने उनको भनाइ छ। जिल्लामा अहिलेसम्म कुनै पनि कुखुरामा बर्डफ्लु नदेखिएको उनले बताए।
