काठमाडौं। चीनमा सार्वजनिक बिदाका कारण सोमबार एसियाली सेयर बजारमा कारोबार मन्द रह्यो भने जापानी सेयर चौथो त्रैमासिकको निराशाजनक आर्थिक वृद्धि तथ्यांकपछि घटेका छन्। दक्षिण कोरिया र ताइवानका बजार पनि बिदाका कारण बन्द रहे।
जापानको निक्केई २५५ सूचकाङ्क ०.२ प्रतिशतले घट्यो भने टोपिक्स सूचकांक ०.८ प्रतिशतले घट्यो। चौथो त्रैमासिकमा कुल गार्हस्थ उत्पादन (जीडीपी) वृद्धि अपेक्षाभन्दा निकै कम रहेको तथ्यांकले बजारमा असर पारेको हो।
जापानी जीडीपी चौथो त्रैमासिकमा वार्षिक आधारमा ०.२ प्रतिशत मात्र बढेको छ, जुन १.६ प्रतिशतको अनुमानभन्दा निकै कम हो। तेस्रो त्रैमासिकको तीव्र संकुचनपछि पनि वृद्धिमा खासै सुधार देखिएको छैन। कमजोर व्यापारिक खर्च, सुस्त निर्यात माग र न्यून निजी उपभोगका कारण वृद्धि प्रभावित भएको हो। टोकियोले २०२५ को अन्त्यतिर ल्याएको प्रोत्साहन योजनाले पनि वृद्धिमा खासै प्रभाव पारेन।
तर, प्रधानमन्त्री सानाए ताकाइचीले आर्थिक वृद्धिलाई समर्थन गर्न थप वित्तीय प्रोत्साहन दिने अपेक्षाले जापानी शेयरमा व्यापक गिरावट भने रोकिएको छ।
हङकङ बजारमा सामान्य वृद्धि
हङकङको ह्याङ सेङ सूचकाङ्क ०.३ प्रतिशतले बढेको छ। धातु खानी कम्पनी सिएमओसी ग्रुप र लाओपु गोल्डका शेयरहरू करिब ६ प्रतिशतले बढे, जुन ह्याङ सेङ सूचकांकमा भर्खरै थपिएका हुन्। ब्याट्री निर्माता कन्टेम्पोरेरी एम्पेरेक्स टेक्नोलोजीको शेयर २.५ प्रतिशतले बढ्यो। अटोमोबाइल रिटेलर झोङशेङ ग्रुपको शेयर भने २ प्रतिशतले घट्यो, जुन सूचकांकबाट हटाइएको छ। चन्द्र नयाँ वर्षका लागि चिनियाँ बजार हप्ताभर बन्द रहनेछन् भने हङकङ मंगलबारदेखि बिहीबारसम्म बन्द रहनेछ।
अष्ट्रेलियाको एएसएक्स २०० सूचकांक ०.२ प्रतिशतले बढ्यो भने सिङ्गापुरको स्ट्रेट्स टाइम्स सूचकांक ०.१ प्रतिशतले घट्यो। भारतको निफ्टी ५० सूचकांकको फ्युचर्स ०.४ प्रतिशतले घटेको छ। कृत्रिम बुद्धिमत्ताको प्रभावबारे चिन्ताले प्रविधि क्षेत्रमा असर पारेपछि शुक्रबार निफ्टी १.३ प्रतिशतले घटेको थियो।
