‘सामाजिक सञ्जाल प्लेटफर्मको सम्पर्क केन्द्र नहुँदा न्याय दिन चुनौती’

प्रविधि

गृहपृष्ठ
प्रविधि

‘सामाजिक सञ्जाल प्लेटफर्मको सम्पर्क केन्द्र नहुँदा न्याय दिन चुनौती’

क्यापिटल नेपाल बिहीबार, वैशाख १०, २०८३

काठमाडौं। प्रहरी महानिरीक्षक दानबहादुर कार्कीले सामाजिक सञ्जाल प्लेटर्फमहरुको सम्पर्क केन्द्र नेपालमा दर्ता नहुँदा विद्युतीय अपराधमा परेका मुद्दाको छिनोफानो गर्न कठिन भएको बताएका छन्।

राष्ट्रियसभा, सङ्घीयता सवलीकरण तथा राष्ट्रिय सरोकार समितिको आज बसेको बैठकमा साइबर बुलिङ तथा साइबर अपराध र नियन्त्रणका लागि भइरहेका प्रयासको ब्रिफिङ गर्ने क्रममा महानिरिक्षक कार्कीले सामाजिक सञ्जालमार्फत ‘फेक आइडी’ बनाउने, गालीगलौज गर्ने, गलत सूचना दिनेलगायत डिजिटल बैंकिङ जस्ता जघन्य अपराध बढिरहेको उल्लेख गर्दै पीडितलाई द्रूत गतिमा न्याय दिन चुनौती थपिएको बताए।

धेरै जसो फेसबुक, इन्स्टाग्राम, हवाट्सएप लगायतका प्लेटफर्मको दुरुपयोग गर्दै हिंसात्मक गतिविधि भएका मुद्दा प्रहरीमा दर्ता भएको उनको भनाइ थियो। उनका अनुसार कार्यालयमा साइबर क्राइमसँग सम्बन्धित दैनिक ८० देखि ९० वटा उजुरी पर्ने गरेका छन्।

प्रहरी कार्यालयमा गत वर्ष साइबर बुलिङ र हिंसाका तीन हजार उजुरी परेको महानिरिक्षक कार्कीले जानकारी दिए। गत वर्ष विद्युतीय अपराधसम्बन्धी १८ हजार ९२६ उजुरी परेका थिए। सामाजिक सञ्जालका प्लेटर्फममार्फत व्यक्तिको चरित्रहत्या गर्ने, यौन हिंसा गर्ने, गालीगलौच गर्ने र मिथ्या झुटा सूचना प्रसार गर्ने लगायतका क्रियाकलापले अपराधिक गतिविधिलाई बढावा दिएको उनले बताए।

प्रकाशित मिति: बिहीबार, वैशाख १०, २०८३ १६:२१

प्रतिक्रिया दिनुहोस्