बाढीपहिरोले क्षतिग्रस्त धुलिखेल खानेपानी आयोजना पुनःनिर्माण

पूर्वाधार

गृहपृष्ठ
पूर्वाधार

बाढीपहिरोले क्षतिग्रस्त धुलिखेल खानेपानी आयोजना पुनःनिर्माण

क्यापिटल नेपाल शनिबार, जेठ २३, २०८३

काभ्रे। २०८१ असोजको बाढीपहिरोले क्षतिग्रस्त काभ्रेपलाञ्चोक सदरमुकाम धुलिखेलमा सञ्चालित बृहत् खानेपानी आयोजनाको पुनःनिर्माण गरिएको छ। त्यतिबेला पनौती नगरपालिका–१२ स्थित सप्तकन्या मुहान क्षेत्रलगायत भौतिक संरचना तथा पाइपलाइनमा ठूलो क्षति पुगेको थियो।

धुलिखेल खानेपानी आयोजनाको ६० प्रतिशत र जर्मन सहयोग नियाग (जीआईजेड) को ४० प्रतिशत आर्थिक सहयोगमा पुनःनिर्माण सम्पन्न भएको नगरका कार्यवाहक प्रमुख निराजन जंगमले बताए। उनका अनुसार बाढीले मुहान क्षेत्र खारखोलामा १५० मिटर मुख्य पाइप लाइनसमेत बगाएको थियो।

त्यतिबेला धुलिखेलमा तीन महिना खानेपानी अवरुद्ध भएको थियो। आयोजना तीन करोड ५१ लाख लागतमा पुनःनिर्माण सम्पन्न भएको उपभोक्ता समिति अध्यक्ष कृष्णभूषण खोजुले जानकारी दिए। गत वर्ष जेठ २० गते पुनःनिर्माण थालिएको थियो। यसका लागि सम्झौताअनुसार जर्मन सरकारबाट ६० प्रतिशत अर्थात् एक करोड ४५ लाख अनुदान प्राप्त भएको उनले बताए।

जर्मन सरकारले सन् १९९२ मा उक्त आयोजना निर्माणमा सहयोग गरेको थियो। बाढीपहिरोको क्षतिपछि नगरले जर्मन दूतावासलाई सहयोगका लागि अनुरोध गरेको थियो।

प्राप्त सहयोग रकमबाट आयोजनाको इन्टेक, पाइप तथा अन्य भौतिक संरचनाको पुुनःनिर्माण गरिएको हो। बाढीले आयोजनामा क्षति हुँदा नगरका ३, ४, ५, ६ र ८ नम्बर वडाका तीन हजार ६०० परिवार खानेपानी सुविधाबाट वञ्चित भएका थिए। त्यतिबेला करिब २० लाख खर्चेर अस्थायी व्यवस्थापन गरी खानेपानीको व्यवस्था गरिएको थियो।

प्रकाशित मिति: शनिबार, जेठ २३, २०८३ ०६:१८

प्रतिक्रिया दिनुहोस्