आर्थिक वर्ष सकिन १ महिना बाँकी, विकास बजेट खर्च ३२.५३ प्रतिशत मात्रै

अर्थतन्त्र

गृहपृष्ठ
अर्थतन्त्र

आर्थिक वर्ष सकिन १ महिना बाँकी, विकास बजेट खर्च ३२.५३ प्रतिशत मात्रै

क्यापिटल नेपाल सोमबार, असार १, २०८३

काठमाडौं। सरकारले चालू आर्थिक वर्ष सकिनै लाग्दा विनियोजित विकास बजेटको जम्मा ३२.५३ प्रतिशत मात्रै खर्च गर्न सकेको छ।

महालेखा नियन्त्रक कार्यालयको तथ्यांकअनुसार चालू आर्थिक वर्षका लागि ४ खर्ब ७८ अर्ब रुपैयाँ पुँजीगत रकम विनियोजन गरिएकोमा ११ महिनाने अवधिमा १ खर्ब ३२ अर्ब रुपैयाँ खर्च भएको हो। ‘असारे विकास’को प्रवृत्तिले यस वर्ष पनि निरन्तरता पाउने संकेत देखिएको छ।

यस अवधिमा चालू खर्चतर्फ ११ खर्ब ८० अर्ब रुपैयाँ विनियोजन गरिएकामा ७६.९१ प्रतिशत अर्थात् ९ खर्ब ८ अर्ब रुपैयाँ खर्च भइसकेको छ।

त्यसैगरी वित्तीय व्यवस्थातर्फ सबैभन्दा बढी ८१.४७ प्रतिशत खर्च भएको छ। ३ खर्ब ७५ अर्ब रुपैयाँ विनियोजन गरिएकोमा ३ खर्ब ५ अर्ब खर्च भएको हो। यसले सरकारको ठूलो हिस्सा विकास निर्माणभन्दा प्रशासनिक खर्च र ऋण व्यवस्थापनमा केन्द्रित रहेको देखाउँछ।

चालू आर्थिक वर्षको ११ महिनामा खर्चसँगै सरकारको आम्दानी पनि कमजोर देखिएको छ। जेठसम्म लक्ष्यको जम्मा ७३.०६ प्रतिशत मात्रै राजस्व संकलन भएको छ। असारसम्म १४ खर्ब ८० अर्ब रुपैयाँ राजस्व उठाउने लक्ष्य राखिएकोमा हालसम्म १० खर्ब ८१ अर्ब रुपैयाँ मात्रै संकलन भएको छ। लक्ष्य पूरा गर्न अब एक महिनामै करिब ४ खर्ब रुपैयाँ राजस्व उठाउनुपर्नेछ।

यस्तै, सरकारले वैदेशिक अनुदानतर्फ ५३ अर्ब ४४ करोड रुपैयाँ बराबरको अनुदान प्राप्त हुने अनुमान गरेकामा हालसम्म जम्मा २२ अर्ब ८८ करोड रुपैयाँ मात्रै प्राप्त भएको छ।

प्रकाशित मिति: सोमबार, असार १, २०८३ १६:१६

प्रतिक्रिया दिनुहोस्