काठमाडौं। लेखक राजु रायमाझीको पहिलो उपन्यास ‘रिमा’ एक समारोहबीच लोकार्पण गरिएको छ। कार्यक्रममा नइ एकेडेमीकी कुलपति तथा त्रिमूर्ति निकेतन एवं बानिरा फाउन्डेशनकी अध्यक्ष इन्दिरा प्रसाईं प्रमुख अतिथिका रुपमा सहभागी भएका थिए।
शिमल बुक्सद्वारा प्रकाशित उक्त कृतिको संयुक्त रुपमा प्रमुख अतिथि इन्दिरा प्रसाईं, लेखककी आमा रमा रायमाझी, साहित्यकार वासुदेव अधिकारी, हरिशरण ढुगांना तथा राजन पुडासैनीले विमोचन गरेका थिए।
कार्यक्रममा वक्ताहरूले ‘रिमा’ले समकालीन समाजका संघर्ष, सपना, प्रेम, सफलता र मानवीय संवेदनालाई यथार्थपरक ढंगले प्रस्तुत गरेको उल्लेख गर्दै नयाँ पुस्ताका स्रष्टा राजु रायमाझीको साहित्यिक यात्राको सफलताको शुभकामना व्यक्त गरेका थिए।
लेखक रायमाझी हाल नेपाल राष्ट्र बैंकमा सहायक निर्देशकका रुपमा कार्यरत छन्। उनले भारतको मैसूर विश्वविद्यालयबाट एमबीए तथा त्रिभुवन विश्वविद्यालयबाट अर्थशास्त्रमा स्नातकोत्तर (एमए) गरेका थिए।
नबिल बैंक र नेपाल राष्ट्र बैंकमा गरी बैंकिङ तथा वित्तीय क्षेत्रमा आठ वर्षभन्दा बढीको अनुभव हासिल गरेका उनीसँग किष्ट कलेज अफ म्यानेजमेन्ट, कलेज अफ एप्लाइड बिजनेस तथा पुष्पलाल मेमोरियल कलेजमा वित्त तथा व्यवस्थापनसम्बन्धी विषय अध्यापन गरेको अनुभव पनि छ।
बैंकिङ पेशासँगै साहित्य सिर्जनामा सक्रिय रायमाझीका कविता साहित्यपोस्टमा, ‘रारालाई नियाल्दा’ नियात्रा मिर्मिरे साहित्यिक पत्रिकामा तथा ‘बैंकर डायरी’ कथा सेतोपाटीमा प्रकाशित भइसकेका छन्।
शिमल बुक्सद्वारा प्रकाशित ‘रिमा’ उपन्यासको सफ्ट कभर संस्करणको मूल्य ४५० तथा हार्ड कभर संस्करणको मूल्य ५५० निर्धारण गरिएको प्रकाशकले जनाएको छ।
