पर्यटन व्यवसायी र राज्यबीच पुलको काम गर्छु : भण्डारी

मुख्य समाचार

गृहपृष्ठ
मुख्य समाचार

पर्यटन व्यवसायी र राज्यबीच पुलको काम गर्छु : भण्डारी

क्यापिटल नेपाल बुधबार, साउन १, २०७६

चिप्लेढुङ्गा । नेपाल पर्यटन बोर्ड गण्डकी प्रदेशका नव नियुक्त प्रमुख काशीराज भण्डारीले यस प्रदेशको समग्र पर्यटन विकासका लागि राज्य र व्यवसायी बीच पुलको काम गर्ने बताएका छन् ।

ट्रेकिङ एजेन्सि एसोसिएसन अफ नेपाल (टान) पश्चिमाञ्चलले आयोजना गरेको बिदाइ एवं स्वागत कार्यक्रममा प्रमुख भण्डारीले नेपालको पर्यटन विकासमा राज्य भन्दा एक कदम अगाडि व्यवसायी रहेको भन्दै व्यवसायी मैत्री नीतिमार्फत राज्य अगाडि बढ्नुपर्ने धारणा राखे । पर्यटन क्षेत्रका समयस्याको पहिचान गरी समाधानका लागि जिम्मेवार रुपले काम गरेर नेपाल भम्रण वर्ष २०२० र आन्तरिक भ्रमण वर्ष २०१९ लाई सफल पार्ने उनको भनाइ छ । पर्यटन क्षेत्रमा नयाँ भिजन को खाँचो औल्याउँदै परम्रागत सोचबाट माथि उठ्न जरुरी रहेको उनको भनाइ थियो ।

नेपालको पर्यटन विशेषगरी विश्वमा पदयात्राबाट चिनिएको स्मरण गर्दै उनले नयाँ पदमार्गको खोजी र भइरहेका पदमार्गको संरक्षण जरुरी रहेको धारणा राखे ।

पर्यटन बोर्ड गण्डकी प्रदेशमा आफ्नो एक वर्ष कार्यकाल सफल गरेर केन्द्रीय कार्यालयमा अनुसन्धान योजना तथा अनुगमन महाशाखाको प्रमुख जिम्मेवारी सम्हाल्न जान लागेका निवर्तमान प्रमुख मणि लामिछानेले पोखरामा पर्यटन व्यवसायीको सक्रियता र सहयोगले आफ्नो कार्यकाल उपलब्धिमूलक एवं ऐतिहासिक रहेको स्मरण गरे ।

टानका पूर्वअध्यक्ष सोम थापाले व्यवसायी र राज्यबीच मैत्रीपूर्ण सम्बन्ध हुन नसके पर्यटन क्षेत्रको विकास नहुने बताए ।

टानका अध्यक्ष हरि भुजेलले टान र पर्यटन बोर्डबीचको सहकार्यमा पर्यटन प्रवद्र्धनसम्बन्धी आन्तरिक र बाह्य रुपमा धेरै काम गर्न सफल भएको धारणा राखे । विशेषगरी टिम्स कार्ड (पदयात्री सूचना व्यवस्थापन प्रणाली) व्यवस्थित गर्न पहल गरिएको उनको भनाइ थियो ।

टानका सचिव जीवनराज सापकोटाले टिम्स कार्डबाट उठेको रकमलाइ यही क्षेत्रमा खर्च गरेर पदयात्रालाई व्यवस्थित बनाउनुपर्ने बताए ।

प्रकाशित मिति: बुधबार, साउन १, २०७६ १४:०४