×

 भक्तपुर–२ मा कांग्रेसका दुलर्भ थापा निर्वाचित, एमालेका महेश बस्नेत पराजित 

images

काठमाडौं । भक्तपुर–२ मा प्रतिनिधिसभा सदस्यमा नेपाली कांग्रेसका उम्मेदवार दुर्लभ थापा विजयी भएका छन । मध्यपुरथिमि नगरपालिका बोडेस्थित नेपाल कृषि विकास बैंकको तालिम केन्द्रमा भएको मतगणना अनुसार उनले नेकपा एमालेका महेश बस्नेतलाई ९५९ को मतान्तरले पराजित गरेका हुन । 

आइतबार सम्पन्न प्रतिनिधिसभा तथा प्रदेशसभा निर्वाचनमा सो क्षेत्रमा कूल ६५ हजार ९९१ मत रहेको थियो ।  सो मध्ये कांग्रेसका उम्मेदवार थापाले २४ हजार २३८ मतले अग्रता प्राप्त गरी विजयी भए भने उनका निकटतम प्रतिद्वन्द्वी महेश बस्नेतले २३ हजार २७९ मत प्राप्त गरे । 

भक्तपुर–२ मा विसं २०४६ मा बहुदल पुनःस्थापनापछि कांग्रेस र नेमकिपाले पालैपालो जित्दै आएका छन् । विसं २०४८ मा कांग्रेसका जगनाथ आचार्य विजयी भएको यस क्षेत्रमा यसपछि क्रमश विसं २०५१ को मध्यावधि निर्वाचनमा नेमकिपाका आशाकाजी बासुकला, ०५६ को निर्वाचनमा पुन कांग्रेसका लेखनाथ न्यौपाने, ०६४ सालको निर्वाचनमा नेमकिपाका सुनील प्रजापति, २०७० सालको निर्वाचनमा कांग्रेसका रामेश्वर ढुङ्गेल र २०७४ सालमा भने एमालेका बस्नेत विजयी भएका थिए ।

नेपाल मजदुर किसान पार्टीका अनुराधा थापामगरले ५हजार ९७३ , राष्ट्रिय स्वतन्त्र पार्टीका साजन विकले ३ हजार ७३३,  राष्ट्रिय प्रजातन्त्र पार्टीका मोहन केसीले २ हजार ३५२ प्राप्त गर्नुभएको  निर्वाचन अधिकृत लोकनाथ पराजुलीले जानकारी दिए ।

 कूल ९१ हजार ९११ मतदाता रहेका यस क्षेत्रमा ६५ हजार ९१९ मत खसेको थियो । मत गणना सक्दा दुई हजार ५३ मत बदर भएको थियो ।
रासस

बिहीबार ८ मंसिर २०७९ ०६:५४ AM मा प्रकाशित

प्रतिक्रिया