अँध्याराेमा बस्नुपर्ने जुम्लीकाे बाध्यता टर्याे, साना जलविद्युत् आयाेजनाकाे परीक्षण सफल

account_box क्यापिटल नेपाल ,
प्रकाशित: २०७६ असाेज ५, आइतबार ,०९:११:AM  
अँध्याराेमा बस्नुपर्ने जुम्लीकाे बाध्यता टर्याे,  साना जलविद्युत् आयाेजनाकाे परीक्षण सफल

खलङ्गा । भारतीय राजदूतावासको सहयोगमा निर्माणाधीन साना जलविद्युत् आयाेजनाकाे मेशिन जुम्ला ल्याएर जडान भइरहेको छ ।

मेशिन जडानसँगै परीक्षणको रूपमा बिजुली बालिएको छ । जुम्ला सदरमुकाममा रहेको एक मात्र बत्तीको विकल्प रहेको साना जलविद्युत् उपभोक्ता समितिको बत्तीको मेशिन समयमा बन्न नसकेपछि लामो समय अँध्यारो भएको र डेढ महीना भन्दा बढी डिजेलबाट कामचलाउ गरिएको थियो ।

निर्माण कार्यको जिम्मा लिएका निर्माण व्यवसायी भारतका पुष्करलाल दुवै र कम्पनीका कर्मचारी मेशिन बनाएर जडानका लागि अहिले खटिरहेका छन् ।

एक मेशिनबाट भने परीक्षणको रुपमा विद्युत् बालिएको छ । सो मेशिन बनेमा दुई/तीन दिनमै २२० केभी क्षमतामा विद्युत् उत्पादन हुने उपभोक्ता समितिका अध्यक्ष बिष्णुबहादुर बुढ्थापाले जानकारी दिए ।

प्राविधिकका अनुसार अब मेशिन दुई/तीन दिनमा पूर्णरुपमा बन्ने र जुम्ला उज्यालो हुने आशा गरिएको निर्माणकार्यको जिम्मा लिएको पुष्करलाल दुवैले बताए ।

मेशिन जडानको ठेक्का लिएको निर्माण कम्पनीले गत असार मसान्तसम्म सम्झौताअनुसार मेशिन जडान गर्न नसकेका कारण जुम्लावासी अँध्यारो मै बस्न बाध्य थिए ।

जिल्ला नै अन्धकार भएपछि सङ्घीय सांसद गजेन्द्रबहादुर महतको पहलमा जिल्लास्थित जनप्रतिनिधि र राजनीतिक दल स्थानीय प्रशासनसहितको सर्वपक्षीय बैठकले सांसद विकास कोषको रकममा डिजेलप्लान्ट खरीद गरेर वैकल्पिक उज्यालोको व्यवस्था गरेको थियो ।

मेशिन अहिले बनेर जुम्ला पुगेपछि भने डिजेल प्लान्ट रोकिएको छ । जम्मा तीन करोड आठ लाखको लागतमा नयाँ मेशिन जडान निर्माणकार्य भइरहेको बताइएको छ ।

कर्णालीकै पहिलो नगरपालिका चन्दननाथ तथा साविकको कर्णाली अञ्चल सदरमुकाम जुम्ला खलङ्गा विगत नौ महीनादेखि मेशिन जडानका कारण जुम्ला अन्धकारमा छ ।

जुम्लामा बिजुली बाल्नका लागि नेपाल विद्युत् प्राधिकरणलेसमेत डिजेल मेशिन पठाएर केही दिन कामचलाउ भएको छ । इञ्जिनीयर सन्तोष चौधरीले भदौ २८ गतेबाट हालसम्म साना जलविद्युत्को साझेदारीमा एक हजार १०० लिटर डिजेल खर्च गरी विद्युत् बालिएको बताए ।

आफूहरु जुम्लाको बत्ती विषयमा एक महीनादेखि खटिरहेको चौधरीले बताए । 

क्यापिटल नेपाल

थप

expand_more
प्रतिक्रिया दिनुहोस
सम्बन्धित समाचार

क्याटेगोरी मुख्य समाचार बाट थप