रिलायबल लाइफ इन्स्योरेन्सले आईपीओ निष्कासन गर्ने

मुख्य समाचार

गृहपृष्ठ
मुख्य समाचार

रिलायबल लाइफ इन्स्योरेन्सले आईपीओ निष्कासन गर्ने

क्यापिटल नेपाल मंगलबार, कात्तिक २५, २०७७

काठमाडौं । रिलायबल लाइफ इन्स्योरेन्स कम्पनी लिमिटेडले प्राथमिक सेयर (आईपीओ) निष्कासन गर्ने भएको छ । कम्पनीले ६० करोड रुपैयाँ बराबरको ६० लाख कित्ता आईपीओ निष्कासन गर्न लागेको हो ।

कम्पनीको अहिले चुक्तापुँजी १ अर्ब ४० करोड रुपैयाँ रहेको छ । आईपीओ निष्कासनपछि कम्पनीको चुक्तापुँजी बढेर २ अर्ब रुपैयाँ पुग्नेछ । रिलायवलले जारीपुँजीको ३० प्रतिशत आईपीओ निष्कासन गर्नेछ । यस्तै ७० प्रतिशत संस्थापक लगानी छ ।

बिमाङकीय मूल्यांकन (एक्चुरी) पूरा गरेपछि साधारणसभा बोलाउने र सभाबाट पारित भएपछि यो वर्षभित्र आईपीओ निष्कासन गर्ने कम्पनीका प्रमुख कार्यकारी अधिकृत (सीईओ) नारायण लोहनीले क्यापिटल नेपाललाई जानकारी दिए । कम्पनीले यो आर्थिक वर्षभित्र आईपीओ निष्कासन गरिसक्ने उनको भनाइ छ ।

रिलायबल २०७४ साल भदौ १५ देखि जीवन बिमा व्यवसाय सुरु गरेको हो । व्यवसाय सुरु गरेको करिव तीन वर्षको अवधिमा कम्पनीले जीवन बिमा कोषमा १ अर्ब १७ करोड रुपैयाँ जम्मा गरेको सार्वजनिक गरेको वित्तीय विवरणमा उल्लेख छ ।

कम्पनीले प्रथम बिमाशुल्कबाट ३७ करोड र नवीकरण बिमाशुल्क १७ करोड गरी कुल ५४ करोड रुपैयाँ आर्जन गरेको छ । अवधिमा १२ लाख ५७ हजार वटा जीवन बिमा पोलिसी जारी गरेको कम्पनीले जनाएको छ ।

प्रकाशित मिति: मंगलबार, कात्तिक २५, २०७७ १६:२६