महिला लघुवित्तले आईपीओ माघ २८ गतेदेखि निष्कासन गर्ने

मुख्य समाचार

गृहपृष्ठ
मुख्य समाचार

महिला लघुवित्तले आईपीओ माघ २८ गतेदेखि निष्कासन गर्ने

क्यापिटल नेपालसोमबार, माघ १९, २०७७

काठमाडौं । महिला लघुवित्त वित्तीय संस्था लिमिटेडले माघ २८ गतेदेखि आईपीओ निष्कासन गर्ने भएको छ । कम्पनीले जारी पूँजी रू. १० करोडको ४० प्रतिशतले हुन आउने रकम रू.४ करोड बराबरको प्रति कित्ता १०० अंकित दरका ४ लाख कित्ता साधारण शेयर निष्कासन गर्ने भएको हो ।

निष्कासन गर्ने कुल शेयरमध्ये जारी पूँजीको शून्य दशमलव ५ प्रतिशत अर्थात ५ हजार कित्ता शेयर कर्मचारीहरुका लागि छुट्याइएको छ । त्यस्तै, सर्वसाधारणका लागि छुट्याइएको शेयरमध्ये ५ प्रतिशत अर्थात २० हजार कित्ता शेयर सामूहिक लगानी कोषका लागि छुट्याइएको छ भने सर्वसाधारणले बाँकी ३ लाख ७५ हजार कित्ता साधारण शेयरका लागि आवेदन दिन सक्नेछन् ।

कम्पनीको आईपीओमा आवेदन दिने अन्तिम मिति छिटोमा फागुन २ र ढिलोमा फागुन १२ गतेसम्म रहेको छ । आवेदकले न्यूनतम १० कित्तादेखि अधिकतम १ हजार कित्तासम्मका लागि आवेदन दिन सक्नेछन् । कम्पनीको आईपीओ निष्काशन तथा विक्री प्रबन्धक नेपाल एसबिआई मर्चेण्ट बैंकिङ लिमिटेड रहेको छ ।

आवेदकले नेपाल धितोपत्र बोर्डबाट स्वीकृती प्राप्त गरेका सम्पूर्ण आस्बा सदस्य बैंक तथा वित्तीय संस्थाहरु र तिनका तोकिएका शाखा कार्यालयहरुबाट आवेदन दिन सक्नेछन् । यसका साथै मेरोशेयर सफ्टवेयर प्रयोग गरी पनि आवेदन दिन सक्नेछन्।

आईपीओ निष्काशनका लागि गराएको रेटिङमा इक्रा नेपालले लघुवित्तलाई ‘इक्राएनपी इस्यअर रेटिङ डबल बी’ प्रदान गरेको छ । यसले वित्तीय दायित्व पूरा गर्न सक्ने सम्बन्धमा मध्यम जोखिम रहेको संकेत गर्दछ ।हाल कम्पनीको चुक्तापूँजी रू. ६ करोड रहेको छ । आईपीओ निष्कासनपश्चात कम्पनीको चुक्तापूँजी १० करोड पुग्नेछ ।

प्रकाशित मिति: सोमबार, माघ १९, २०७७ ०८:२९

प्रतिक्रिया दिनुहोस्