घोषणापत्रले प्राथमिकतामा राखेका विषय हुबहु कार्यान्वयन आवश्यक

विचार

गृहपृष्ठ
विचार

घोषणापत्रले प्राथमिकतामा राखेका विषय हुबहु कार्यान्वयन आवश्यक

सुहृद घिमिरे मंगलबार, वैशाख ८, २०८३

नयाँ सरकारबाट हाम्रो अपेक्षा भनेको चुनावी घोषणापत्रमा उल्लेख गरेका प्रतिबद्धता प्रभावकारी रूपमा कार्यान्वयन गरोस् भन्ने हो। ती प्रतिबद्धता कार्यान्वयन भए व्यापार व्यवसाय सञ्चालनका लागि आवश्यक वातावरण स्वतः सहज बन्ने विश्वास छ।

घोषणापत्रमा विशेषगरी सुशासन र डिजिटल सेवाका कुरालाई प्राथमिकता दिइएको छ। सरकारी कार्यालयहरूमा धेरै धाइरहनु नपर्ने गरी ‘डिजिटल अप्रुभल’ र अनलाइन प्रणालीको विकास गर्ने जुन प्रतिबद्धता छ, त्यो निकै महत्त्वपूर्ण छ।

कतिपयलाई लाग्न सक्छ कि कुनै खास क्षेत्रलाई मात्र तोकेर केही आएन। तर, वास्तविकता के भने जब देशमा सुशासन कायम हुन्छ र प्रशासनिक प्रक्रिया सहज हुन्छन्, तब सबै क्षेत्रका समस्या स्वतः समाधान हुँदै जान्छन्।

निजी क्षेत्रले सरकारसँग सहुलियत वा अनुदान भन्दा पनि केवल ‘व्यापार गर्ने उपयुक्त वातावरण’ चाहन्छन्। यदि सरकारले घोषणापत्रमा उल्लेख गरेबमोजिम सुशासनलाई व्यवहारमा उतार्न सक्यो र प्रशासनिक झन्झट हटाइदियो भने निजी क्षेत्रले अहिलेको शिथिलता चिर्दै अगाडि बढ्न सक्छ।

मुलुकमा अहिलेसम्म देखिएको मुख्य कमजोरी नै सुशासनको अभाव हो। यदि नयाँ सरकारले आफ्नो प्रतिबद्धताअनुसार सुशासन कायम गर्न सके व्यापार व्यवसायका लागि अनुकूल वातावरण सिर्जना हुनेछ। अहिलेका लागि यत्ति अपेक्षा पूरा भए पनि पर्याप्त हुन्छ भन्ने लाग्छ।

प्रकाशित मिति: मंगलबार, वैशाख ८, २०८३ १०:०२

प्रतिक्रिया दिनुहोस्