क्रेता र बिक्रेताबीच मोलमोलाई, बजार लयमा फर्किने संकेत

मुख्य समाचार

गृहपृष्ठ
मुख्य समाचार

क्रेता र बिक्रेताबीच मोलमोलाई, बजार लयमा फर्किने संकेत

क्यापिटल नेपाल सोमबार, फागुन २३, २०७८

काठमाडौं । सेयर बजार विस्तारै लयमा फर्किन प्रयत्नमा लागेको छ । यस दिन नेप्से सूचक १.५४ अंकले बढेर २५४४.९३ विन्दुमा आएको छ । २ अर्ब ६० करोड रुपैयाँभन्दा बढीको सेयर कारोबार भएको छ । प्यानिक सेल सकिएर बजारले बटम लगाउन खोजेको जस्तो छनक दिएको छ । खदिर बिक्री रकम घटेको छ । साथै, नेप्सेको भारी उतारचढाव पनि विस्तारै मत्थर हुन थालेको छ । यसआधारमा बजार विस्तारै लयमा फर्किन खोजेको अनुमान गर्न सकिन्छ ।

अब बजारले उकालो यात्रा समाउँछ वा केही समय साइडवेजमा बस्छ भनेर अझै सूक्ष्म तरिकाले अध्ययन गर्न आवश्यक रहेको विश्लेषकहरुले बताएका छन् । निरन्तर घटेको बजारमा उतारचढाव कम हुँदै जानुले सकारात्मक संकेत दिन्छ । यस्तै, टर्नओभर कम भएकाले प्यानिक सेलर सकिएको र क्रेता र बिक्रेताबीच विस्तारै मोलमोलाइको वातावरण बनिरहेको अनुमान गर्न पनि गर्न सकिन्छ ।

यदद्पि, सेयर बजारको प्रवत्ति र लगानी सम्बन्धी निर्णय लगानीकर्ता स्वविवेकमा गर्नुपर्छ । समग्रमा लामो समयदेखि बजार अस्थिर बनेको छ । बजारले दह्रो बुलिस मोमेन्टम समाउन सकेको छैन । वित्तीय प्रणालीमा तरलता टाइट हुनु, सोही कारण बैंकहरुले ब्याजदर वृद्धि गर्नु लगायत कारणले सेयर बजार लामो समयदेखि प्रभािवत बन्दै आएको छ ।

यसबीचमा केन्द्रीय बैंकको नीतिगत अस्थिरताले पनि बजारलाई अप्ठेरोमा पारेको हो । कहिले सेयर कर्जामा ४–१२ करोडको सीमा त कहिले जोखिम भार वृद्धिका विषय अघि सारेर केन्द्रीय बैंकले सेयर बजारलाई अप्ठेरोमा पार्ने काम गर्दै आएको लगानीकर्ताहरुले गुनासो गरेका छन् ।

बजार निरन्तर थपिएको आपूर्ति व्यवस्थापन गर्ने धितोपत्रका आधुनिक औजारहरु पनि कमी रहेको छ । यसले पनि आपूर्ति व्यवस्थापनमा समस्या भएको विश्लेषकहरुले बताउँदै आएका छन् । सेयर बजारमा आम लगानीकर्ताको मनोविज्ञानको निकै ठूलो भूमिका रहने गर्छ । यसर्थ, लगानीकर्ताको सकारात्मक मनोभावना विकास गराउनका लागि नीतिनिर्माता र नियामकहरुले काम गर्नुपर्ने आवश्यकता देखिएको छ ।

बजार घट्दा होस् वा बढ्दा, लगानीकर्ताले कम्पनीहरुले सार्वजनिक गरेका वित्तीय विवरणहरु, सम्बद्ध कम्पनीको व्यवस्थापन र सञ्चालकहरुका बारेमा पनि अध्ययन गर्नुपर्छ । यस्तै, सम्बद्ध क्षेत्रमा व्यवसायको अवसर र प्रतिस्पर्धा, कम्पनीहरुको पुँजी कति छ ? नियमनको अवस्था कस्तो छ ? भन्ने विषयतर्फ पनि अध्ययन गर्न अनुभवीहरुले सुझाव दिने गरेका छन् ।

लगानीकर्ताले कुन उद्देश्यले सेयर किन्ने हो ? आफू इन्भेष्टर र कि ट्रेडर भन्नेसमेत ध्यान दिंदै सोही अनुसार रणनीतिहरु तय गर्नुपर्ने हुन्छ । सबल वित्तीय सूचक भएका कम्पनीहरुमा सकेसम्म दीर्घकालीन हिसाबले लगानी गर्न सके लाभ लिन सकिने अनुभवीहरु बताउँछन् ।

प्रकाशित मिति: सोमबार, फागुन २३, २०७८ १५:४०