क्यापिटल प्लानले उचाल्यो बिमा कम्पनीको मूल्य, अन्य सूचक राताम्मै

मुख्य समाचार

गृहपृष्ठ
मुख्य समाचार

क्यापिटल प्लानले उचाल्यो बिमा कम्पनीको मूल्य, अन्य सूचक राताम्मै

क्यापिटल नेपाल बिहीबार, चैत १०, २०७८

काठमाडौं । बिमा समितिले बिमा कम्पनीको पुँजी बढाउन गृहकार्य सुरु गरेसँगै सेयर बजारमा जीवन र निर्जीवन बिमा कम्पनीको सेयर उचालिएको छ । सूचक ह्रास हुँदा टर्नओभरमा पनि अघिल्लो दिनको तुलनामा वृद्धि भएको छ ।

यस दिन नेप्से सूचक १६.६९ अंकले घटेर २६१३.६७ बिन्दुमा अडिएको छ । ३ अर्ब २४ करोड रुपैयाँभन्दा बढीको सेयर कारोबार भएको छ । ३ वटा कम्पनीमा सकारात्मक सर्किट लागेको छ । यस दिन जीवन र निर्जीवन दुवै बिमा समूहमा चमक आएको छ ।

केही दिनयता बिमा समूहले सकारात्मक संकेतहरु देखाइरहेका छन् । समग्रमा हेर्दा, बजार केही दिनयता २६ सयभन्दा केहीमाथि बसेर सामान्य हिसाबले तलमाथि गरिरहेको छ । २६ सयलाई बटम बनाएर नेप्से माथितिर लागे पनि राम्रोसँग वृद्धि सकेको छैन । यस्तै, तल झर्न पनि मानिरहेको छैन । यसअघि बजार २५ सय विन्दुबाट फर्किएको हो ।

विश्लेषकहरुका अनुसार नेप्सेले माथितिरै जान खोजिरहेको छ । तर यसका लागि बजारले कुनै गतिलो गुड न्यूज खोजिरहेको छ । करिब ८ महिनादेखि बजार करेक्सनकै चरणमा रहेको छ । ३२ सयको उच्चतम विन्दु आसपासबाट फर्किएको नेप्सेले अहिलेसम्म त्यो उचाई छुन सकेको छैन । यसकारण लगभग शिथिल भएको बजारलाई माथि जान केही गुड न्यूज चाहिएको छ । यसका लागि सरकार तथा नियामक निकायहरुबाट केही सुधारका कार्यक्रम आउन आवश्यक देखिएको छ ।

यससँगै वित्तीय प्रणालीमा तरलता सहज हुने समयको प्रतीक्षमा पनि बजार रहेको छ । यस्तै, बिमा लगायतका क्षेत्रहरुमा पुँजी वृद्धिको खबर आउन सक्यो भने पनि बजारले नयाँ उचाई लिन सक्ने विश्लेषणहरु भइरहेका छन् । बिमा समितिले बिमा कम्पनीहरुको पुँजी वृद्धि गरिने बताए पनि अहिलेसम्म आधिकारिक रुपमा सूचना आउन सकेको छैन । पुँजी वृद्धिको निर्णय कहिले हुने र कुन मोडेलमा पुँजी वृद्धि गरिने भन्ने कुरा खुल्न सकेको छैन ।

यस्तै, केन्द्रीय बैंकले पनि सबल वित्तीय सूचक भएका तर पुँजी पर्याप्तता अनुपात मिलाउन नसकेका र सोही कारण व्यवसाय विस्तार गर्न कठिन भएका बैंकहरुलाई हकप्रद सेयर जारी गर्न दिन्छ भन्ने अपेक्षमा लगानीकर्ता रहेका छन् ।

हाम्रो बजारको बुल रनलाई हेर्ने हो भने पनि पुँजी वृद्धिले नै बजारमा सधैं रौनकता ल्याएको देखिन्छ । यस्तै, बजारमा बैंकलाई ब्रोकर लाइसेन्स दिने, ब्रोकर कमिसन घटाउने लगायतका सुधारका काम गरेर पनि लगानीकर्ताको मनोबल सुधार्न सकिने ठाउँ रहेका छन् । तर हाम्रा नियमकहरुले यस्ता विषयमा वास्तवमै काम गर्न सकेका छैनन् । अहिलेको अवस्थामा लगानीकर्ताको मनोबल वृद्धि नहुँदासम्म बजार माथि जान कठिन हुन सक्छ ।

त्यसो त, सेयर बजारमा विस्तारै सिजन सुरु हुँदैछ । वैशाख लागेपछि कम्पनीहरुको तेस्रो त्रैमासको रिपोर्ट आउनेछ । स्थानीय निकायको निर्वाचन पनि नजिकिंदैछ । यस्तै, सरकारले खर्च गर्नेक्रम अब बढ्दै जानेछ । यी विषयले पनि बजारमा सकारात्मक माहोल ल्याउन भूमिका खेल्न सक्छ ।

यस दिन २२४ कम्पनीको ५२ लाख ९८ हजारभन्दा बढी कित्ता सेयर खरिदबिक्री भएका छन् । जीवन र निर्जीवनबाहेक बाँकी सबै समूहहरु घटेका छन् । ३० करोड ६३ लाख रुपैयाँभन्दा बढीसहित जीवन विकास लघुवित्त कारोबार रकममा अग्रस्थानमा रहेको छ । यसको लाभांश हात पार्ने आज अन्तिम दिन पनि हो । यसैगरी, दोस्रो र तेस्रोमा क्रमशः नेपाल टेलिकम र एलआइसी नेपाल परेका छन् ।

प्रकाशित मिति: बिहीबार, चैत १०, २०७८ १५:२२

प्रतिक्रिया दिनुहोस्