आजदेखि सीवाईसी नेपालको आईपीओको बिक्री खुला

मुख्य समाचार

गृहपृष्ठ
मुख्य समाचार

आजदेखि सीवाईसी नेपालको आईपीओको बिक्री खुला

क्यापिटल नेपालशुक्रबार, वैशाख २, २०७९

काठमाडाैं । सीवाईसी नेपाल लघुवित्त वित्तीय संस्था लिमिटेडले आजदेखि प्राथमिक सार्वजनिक निष्कासन (आईपीओ)को बिक्री खुला गर्ने भएको छ । कम्पनीले प्रतिकित्ता १०० अङ्कित ३ करोड ९५ लाख ३३ हजार ६ सय बराबरका ३ लाख ९५ हजार ३ सय ३६ कित्ता साधारण सेयर निष्कासन तथा बिक्री खुला गर्न लागेको हो ।

कम्पनीले कुल निष्कासनमध्ये पाँच प्रतिशत अर्थात् १९ हजार ७ सय ६६ कित्ता सेयर सामूहिक लगानी कोष र जारी पुँजीको शून्य दशमलव पाँच प्रतिशत अर्थात् ६ हजार ८२ कित्ता कर्मचारीलाई सुरक्षित गरी बाँकी रहने ३ लाख ६९ हजार ४ सय ८८ कित्ता सेयर सर्वसाधारणलाई छुट्याइएको छ ।

सर्वसाधारणले न्यूनतम १० कित्तादेखि अधिकतम एक हजार कित्ता सेयर खरिदका लागि आवेदन दिन सक्ने कम्पनीले सार्वजनिक गरेको सूचनामा उल्लेख छ । साथै निष्कासन गरिएको सेयर खरिदका लागि यही वैशाख ६ गतेसम्म आवेदन दिन सकिने र सो समयावधिसम्म मागबमोजिम आवेदन नआए वैशाख १६ गतेसम्म निष्कासन खुला रहने कम्पनीले जनाएको छ ।

सर्वसाधारणले नेपाल धितोपत्र बोर्डबाट स्वीकृतप्राप्त गरेका सम्पूर्ण सी आस्बा सदस्य बैंक तथा वित्तीय संस्था र तिनका शाखा कार्यालयका साथै अनलाइनबाट ‘मेरो सेयर’ प्रयोग गरेर आवेदन दिन सकिने कम्पनीको सार्वनजिक सूचनामा उल्लेख छ ।

कम्पनीको धितोपत्र निष्कासन तथा बिक्री प्रबन्धक ग्लोबल आईएमई क्यापिटल लिमिटेड छ । कम्पनीलाई केयर रेटिङ संस्था केयर नेपाल लिमिटेडले ‘केयर एनपी बिबी माइनस इस्युअर’ रेटिङ प्रदान गरेको छ । रासस

प्रकाशित मिति: शुक्रबार, वैशाख २, २०७९ १०:५३

प्रतिक्रिया दिनुहोस्