उत्तरकोरियाले फेरि गर्‍याे क्षेप्यास्त्र परीक्षण

मुख्य समाचार

गृहपृष्ठ
मुख्य समाचार

उत्तरकोरियाले फेरि गर्‍याे क्षेप्यास्त्र परीक्षण

क्यापिटल नेपाल आइतबार, कात्तिक २०, २०७९

एजन्सी । ‘भिजिल्याण्ट स्टोर्म’ नामक अमेरिका– दक्षिणकोरिया संयुक्त सैन्य अभ्यासलाई सैनिक टकरावको उन्माद भन्दै आएको उत्तरकोरियाले उक्त अभ्यास सकिएकै दिन शनिबार पुनः चारवटा क्षेप्यास्त्र परीक्षण गरेको छ ।

प्योङयाङले पश्चिमी समुद्रमा चारवटा छोटो दूरीका ‘ब्यालेस्टिक मिसाइल’ परीक्षण गरेको दक्षिणकोरियाली जनाउँदै उसले उत्तरकोरिया परमाणु हतियार परीक्षण पुनः सुरु गर्ने तयारीमा रहेको बताएको छ । दक्षिणकोरियाले प्योङयाङका उत्तेजक गतिविधिलाई दृढतापूर्वक जवाफ दिने बताउँदै कोरिया र अमेरिकाको संयुक्त प्रतिरक्षा क्षमता क्षीण नभएको चेतावनी दिएको छ ।

प्योङयाङले शुक्रबार संयुक्त राज्य अमेरिका र दक्षिणकोरियालाई उत्तेजक वायुसेनाको अभ्यास रोक्न माग गरेको थियो । अभ्यासका क्रममा सुपरसोनिक बमवर्षक विमानसमेत समावेश गरिएपछि चिढिएको उत्तरकोरियाले संयुक्त सैन्य अभ्यास समाप्त हुनेबित्तिकै फेरि क्षेप्यास्त्र परीक्षण गरेको हो ।

वायु सेनाको संयुक्त अभ्यासमा दुवै देशका अत्याधुनिक एफ थर्टीफाइभ लडाकु विमानसहित २ सय ४० विमान समावेश थिए । उक्त अभ्यासबाट आाक्रोशित प्योङयाङले गत साता सुमद्रमा दर्जनौं क्षेप्यास्त्र प्रक्षेपण गर्नाका साथै अन्तरमहादेशीय क्षेप्यास्त्र परीक्षण गरेको थियो । उसले आन्तरिकरूपमा युद्धविमानसमेत उडाएर युद्धका निम्ति तम्तयार रहेको सन्देश प्रवाह गरेको थियो ।

यसैबीच, संयुक्त राज्य अमेरिका तथा उसका सहयोगी एवम् चीन र रूसका कूटनीतिज्ञबीच राष्ट्रसंघीय सुरक्षा परिषदमा गम्भीर मतभेद भएको छ ।

अमेरिका र उसका सहयोगीले चीन र रूसको संरक्षणमा प्योङयाङले क्षेप्यास्त्र परीक्षणलाई तीव्र गतिमा अघि बढाएको आरोप लगाउँदै त्यसले कोरियाली प्रायद्वीपमा दिगो शान्ति तथा स्थायित्व कायम गर्ने प्रयास निरर्थक भएको र निःशस्त्रीकरणसम्बन्धी सुरक्षा परिषद्का प्रस्ताव उल्लंघन भएकामा आपत्ति जनाएका छन् ।

प्रकाशित मिति: आइतबार, कात्तिक २०, २०७९ १६:३७

प्रतिक्रिया दिनुहोस्