गौतमबुद्ध अन्तर्राष्ट्रिय विमानस्थलबाट नेपाल एयरलाइन्सको उडान सुरु हुन्छः मन्त्री किराँती

मुख्य समाचार

गृहपृष्ठ
मुख्य समाचार

गौतमबुद्ध अन्तर्राष्ट्रिय विमानस्थलबाट नेपाल एयरलाइन्सको उडान सुरु हुन्छः मन्त्री किराँती

क्यापिटल नेपालआइतबार, माघ २२, २०७९

भैरहवा। संस्कृति, पर्यटन तथा नागरिक उड्डयनमन्त्री सुदन किराँतीले गौतमबुद्ध अन्तर्राष्ट्रिय विमानस्थलबाट नेपाल एयरलाइन्सको उडान सुरु गर्ने बताएका छन्।

विमानस्थल निरीक्षणपछि उनले यस विषयमा पहल गर्ने बताए। विमानस्थलमा सञ्चारकर्मीसँग कुरा गर्दै मन्त्री किराँतीले राष्ट्रिय ध्वजाबाहक जहाज किन आएका छैनन् भन्ने विषयमा आफूले छलफल गर्ने र उडान थाल्ने आश्वासन दिए।

नेपाल एयरलाइन्स मात्र नभइ अन्य विमानसेवाको उडानका लागि पनि आफूले पहल गरिरहेको उनको भनाइ छ। श्रीलंका भ्रमणमा रहनुभएका परराष्ट्रमन्त्रीमार्फत कोलम्बो–भैरहवा–कोलम्बो उडानका लागि पनि पहल गरिएको मन्त्री किराँतीले जानकारी दिए।

प्रधानमन्त्रीको भारत भ्रमणका बेला आइएलएस, रुट परमिट, दिल्ली–भैरहवा उडानलगायत विषयमा भारतको सहयोगसम्बन्धी एजेन्डालाई पहिलो प्राथमिकतामा राखी पहल गर्ने उनले बताए।

मन्त्री किराँतीले यस विमानस्थल सञ्चालनका लागि कूटनीतिक र प्राविधिक समस्या समाधान गर्ने प्रतिबद्वता व्यक्त गर्दै विमानस्थल सञ्चालनका लागि आवश्यक सबै सहयोग उपलब्ध गराउने पनि बताए। विमानस्थलमा नियमित उडान गरेको जजिरा र हिमालय एयरलायन्सले मौसम खराबीका कारण देखाउँदै गत पुसमा उडान रोकेका थिए।

नेपाल र चीनका निजी क्षेत्रको संयुक्त लगानी रहेको हिमालयन एयरलायन्सले गत पुस १ र जजिराले पुस ६ गतेदेखि उडान रोकेका हुन्। विमानस्थलमा हालसम्म एक सय ५४ अन्तर्राष्ट्रिय उडान र त्यत्तिकै संख्यामा अवतरण भएका थिए। सो अवधिमा ३२ हजार यात्रुले सेवा लिएको विमानस्थलले जनाएको छ।

प्रकाशित मिति: आइतबार, माघ २२, २०७९ १४:५५

प्रतिक्रिया दिनुहोस्