टेलिकमद्वारा १ हजार जिबिपिएससम्म उच्च गतिको एफटिटिएच इन्टरनेट सेवा सुरु

प्रविधि

गृहपृष्ठ
प्रविधि

टेलिकमद्वारा १ हजार जिबिपिएससम्म उच्च गतिको एफटिटिएच इन्टरनेट सेवा सुरु

क्यापिटल नेपालबिहीबार, साउन २५, २०८०

काठमाडौं। नेपाल टेलिकमले १ जिबिपिएस (१ हजार एमबिपिएस) सम्म उच्च गति भएको एफटिटिएच इन्टरनेट सेवा सुरु गरेको छ। यसअघि कम्पनीले १०० एमबीपीएस सम्म उच्च गति भएको एफटिटिएच सेवा उपलब्ध गराइरहेकोमा अब एकैपटक यति धेरै क्षमता भएको इन्टरनेट सेवा उपलब्ध गराएको हो।

हाल कम्पनीले जीपोन प्रविधिमार्फत उपलब्ध गराइरहेको एनटी फाइबर इन्टरनेटमध्ये सबैभन्दा उच्च गति १०० एमबिपिएस रहेकोमा अब एक्सजिपोन प्रविधिमा आधारित उच्च गतिको इन्टरनेट सेवा उपलब्ध गराउने छ।

उक्त सेवा ५ सय एमबिपिएस र १ जिबिपिएस गरी दुई प्याकेजमा उपलब्ध हुनेछ। यसको डाउनस्ट्रिम क्षमता १० जिबिपिएस र अपस्ट्रिम क्षमता २.५ जिबिपिएस हुनेछ। प्रिमियम एफटिटिएच ५ सय एमबिपिएसअन्तर्गत टेलिकमको नेटवर्कभित्र अनलिमिटेड कल गर्न सकिनेछ भने अन्य नेटवर्कमा प्रतिमहिना ३ सय ५० मिनेट कल गर्न सकिनेछ। यो प्याकमा ०.५ टिबी डेटा प्रतिदिन प्रयोग गर्न सकिने छ।

त्यस्तै प्रिमियम एफटिटिएच १ जिबिपिएसअन्तर्गत नेपाल टेलिकमको नेटवर्कभित्र अनलिमिटेड कल गर्न सकिनेछ भने अन्य नेटवर्कमा प्रतिमहिना ५०० मिनेट कल गर्न सकिनेछ। यो प्याकमा १ टिबी डेटा प्रतिदिन प्रयोग गर्न सकिनेछ।

दुवै प्याकेजमा एउटा आइपिटिभी, सिपिइ र सेटटप बक्स तथा ३ सय मिटर ड्रप फाइबर निःशुल्क उपलब्ध हुने कम्पनीले जनाएको छ। ५ सय एमबिपिएसको ‘प्रिमियम एफटिटिएच ५ सय एमबिपिएस’ प्याकेज वार्षिक ८० हजार रुपैयाँ र १ जिबिपिएसको ‘प्रिमियम एफटिटिएच १ जिजिपिएस’ प्याकेज वार्षिक १ लाख १० हजार रुपैयाँमा उपलब्ध हुनेछ।

यो सेवा वा अन्य एफटिटिएच सेवा प्राप्त गर्न चाहने सेवाग्राहीले १९८ मा डायल गरी प्राप्त सन्देशपश्चात फेरि १ डायल गरी आफूलाई आवश्यक पर्ने सेवा जडान तथा मर्मतका लागि दर्ता गर्न सकिने व्यवस्था छ। हालका लागि कम्पनीले काठमाडौं उपत्यकामा यो सेवा उपलब्ध गराएको छ।

प्रकाशित मिति: बिहीबार, साउन २५, २०८० १८:२१

प्रतिक्रिया दिनुहोस्