सामाजिक सञ्जाल नियमन गर्न ढिलाइ भइसक्यो : मन्त्री शर्मा

प्रविधि

गृहपृष्ठ
प्रविधि

सामाजिक सञ्जाल नियमन गर्न ढिलाइ भइसक्यो : मन्त्री शर्मा

क्यापिटल नेपाल बिहीबार, भदौ ७, २०८०

काठमाडौं। सञ्चार तथा सूचना प्रविधिमन्त्री रेखा शर्माले सामाजिक सञ्जाल नियमन गर्न ढिलाइ भइसकेको बताएकी छिन्।

काठमाडौंमा आयोजित एक कार्यक्रममा मन्त्री शर्माले मन्त्रालय सामाजिक सञ्जाल प्रयोग व्यवस्थित गर्ने कानुन निर्माणको चरणमा रहेको उल्लेख गर्दै यस्तो बताएकी हुन्।

विगतमा सामाजिक सञ्जाल नियमन कसरी गर्ने वा गर्ने कि नगर्ने भन्ने सन्दर्भमा फरक– फरक धारणा रहेको भए पनि अहिले नियमन आवश्यक रहेकोमा सबै क्षेत्रमा एक मत देखिनु सकारात्मक घटनाक्रम भएको उनको भनाइ छ।

‘एक दुई वर्षअघि यही विषय उठाउँदा विरोध हुने गरे पनि अब नियमन गर्न हामीले ढिला गरिरहेका छौं भन्ने जुन धारणा सबै क्षेत्रबाट आइरहेको छ, यो जनस्तर र सबै क्षेत्रको आवाज बुझेर नै हामीले कानुन निर्माण तयारी थालेका हौं,’ उनले भनिन, ‘हामीले सञ्चार तथा सूचना प्रविधि मन्त्रालयमा कार्यदल बनाएर यो काम गरिरहेका छौं। अहिलेसम्मका अन्तराष्ट्रिय अभ्यासलाई हेर्दा पनि स्वनियमन र सचेतनामै जोड दिनु उपयुक्त देखिएको छ।’

प्रयोगकर्ता र सामाजिक सञ्जाल सञ्चालन गर्ने प्लेटफर्मले स्वनियमन गर्ने, त्यसका लागि ब्यापक साइबर सचेतना जागृत गर्ने र त्यति गर्दा पनि सामाजिक सञ्जालबाट समाजका विभिन्न तप्काले हिंसा महसुस गर्ने सामग्री प्रकाशन÷प्रसारण भएमा नियमन र कानुनी कारबाहीको बाटोमा जाने विधि नै उपयुक्त हुने उनले स्पष्ट पारिन्।

सरोकारवालासँग छलफल गरेर मस्यौदा तयार पारी मन्त्रालयको वेबसाइटमा राखिने र त्यसमा आउने उपयुक्त राय सुझावलाई समेट्ने प्रतिबद्धता पनि मन्त्री शर्माले व्यक्त गरिन्।

प्रकाशित मिति: बिहीबार, भदौ ७, २०८० १४:५५

प्रतिक्रिया दिनुहोस्