रेमिट्यान्स ३० प्रतिशत वृद्धि, ३ खर्ब ६५ अर्ब भित्रियो

अर्थतन्त्र

गृहपृष्ठ
अर्थतन्त्र

रेमिट्यान्स ३० प्रतिशत वृद्धि, ३ खर्ब ६५ अर्ब भित्रियो

क्यापिटल नेपालशुक्रबार, कात्तिक २४, २०८०

काठमाडौं। चालू आर्थिक वर्ष पहिलो तीन महिनासम्म नेपालमा ३ खर्ब ६५ अर्ब रूपैयाँ बढी रेमिट्यान्स भित्रिएको छ।

नेपाल राष्ट्र बैंकद्वारा सार्वजनिक देशको वर्तमान आर्थिक तथा वित्तीय प्रतिवेदनअनुसार असोज महिनासम्म ३ खर्ब ६५ अर्ब ३४ करोड रुपैयाँबराबर विप्रेषण (रेमिट्यान्स) आप्रवाह भएको छ।

समीक्षा अवधिमा विप्रेषण आप्रवाह ३० प्रतिशतले वृद्धि भएको हो। अघिल्लो वर्ष सोही अवधिमा विप्रेषण आप्रवाह १६.८ प्रतिशतले बढेको थियो।

अमेरिकी डलरमा विप्रेषण आप्रवाह २५.९ प्रतिशतले वृद्धि भई २ अर्ब ७६ करोड पुगेको छ। अघिल्लो वर्ष यस्तो आप्रवाह ७.९ प्रतिशतले बढेको थियो।

यस्तै समीक्षा अवधिमा वैदेशिक रोजगारीका लागि अन्तिम श्रम स्वीकृति (संस्थागत तथा व्यक्तिगत–नयाँ) लिने नेपालीको
संख्या १ लाख १३ हजार ३ सय ९७ र पुनः श्रम स्वीकृति लिनेको संख्या ४९ हजार २ सय ९७ रहेको छ।

अघिल्लो वर्षको सोही अवधिमा यस्तो संख्या क्रमश १ लाख ४७ हजार ९ सय ३२ र ५७ हजार ८ सय ६१ रहेको थियो।

समीक्षा अवधिमा खुद ट्रान्सफर ३०.२ प्रतिशतले वृद्धि भई ४ खर्ब ४ अर्ब ४ करोड पुगेको छ। अघिल्लो वर्ष सोही अवधिमा यस्तो ट्रान्सफर १७.१ प्रतिशतले बढेको थियो।

प्रकाशित मिति: शुक्रबार, कात्तिक २४, २०८० १४:५६

प्रतिक्रिया दिनुहोस्