चीनबाट ल्याइएको रासायनिक मल १० महिनादेखि गोदाममै

कृषि

गृहपृष्ठ
कृषि

चीनबाट ल्याइएको रासायनिक मल १० महिनादेखि गोदाममै

क्यापिटल नेपाल मंगलबार, फागुन ८, २०८०

चौतारा। चीनबाट ल्याइएको रासायनिक मल १० महिनादेखि तातोपानी भन्सारको गोदाममा थन्किएको छ। एक सय ११ कन्टेनरमार्फत वैशाख महिनामा ल्याइएको रासायनिक मल तातोपानी भन्सारको गोदाममै थन्किएको हो। ७ लाख ३५ हजार बोरा रासायनिक मल लार्चा सुक्खा बन्दरगाह यार्डभित्र गोदाममा थन्किए पनि किसानले मल नपाएको गुनासो गर्दै आएका छन्।

कृषि सामग्री कम्पनी र आयातकर्ताको हेलचक्र्याइँले मल गोदामबाट उठ्न नसक्दा अरू सामान लोड–अनलोड गर्न कठिनाइ परेको तातोपानी भन्सार कार्यालयका प्रमुख दयानन्द केसीले बताए। खासा भएर तातोपानी सुक्खा बन्दरगाहमा आएका अन्य सामग्री भन्सार कार्यालयभित्र राखेर चेकजाँच गर्नुपर्ने अवस्था छ। रासायनिक मलको राजस्व असुल नहुने भएकाले कृषि सामग्री कम्पनी लिमिटेडले चिनियाँ सहरबाट झिकाएर सिधै राजधानी लाने गरे पनि उक्त मल गोदाममै थन्किएको उनले जानकारी दिए।

भूकम्प र कोरोनाका कारण बन्द रहेको नामा खुलेपछि एकछत्र काम गर्दै आएको सिल्क कम्पनीअन्तर्गत रहेको सिल्क मार्केट प्रालिले चीनबाट मल आयात गरेको थियो। सिल्क मार्केट प्रालिले नेपाल सरकारको कृषि सामग्री कम्पनी लिमिटेडबाट रासायनिक मल आयात गर्ने ठेक्का पाएको थियो। सम्झौताअनुसार सिल्क मार्केटले रासायनिक मल समयमै ल्याउन नसकेका कारण कृषि सामग्री कम्पनीले मल स्वीकार नगरेको कतिपयको भनाइ छ।1

गत वर्ष ल्याउनुपर्ने मल यो वर्षको जेठमा मात्रै आयात भएपछि कृषि सामग्री कम्पनीले मल लिन नमानेको सिल्क मार्केटका रमेश शेर्पाले बताए। कृषि सामग्री कम्पनी लिमिटेडसँग कुराकानी गरिरहेको र प्रक्रिया पूरा भएपछि मल काठमाडौँ लगिने शेर्पाको भनाइ छ। रासस

प्रकाशित मिति: मंगलबार, फागुन ८, २०८० १२:०९

प्रतिक्रिया दिनुहोस्