विदेशी मुद्रा भुक्तानीका लागि दूरसञ्चार प्राधिकरणबाट ४ अर्ब ७३ करोड रुपैयाँ बराबर सिफारिस

प्रविधि

गृहपृष्ठ
प्रविधि

विदेशी मुद्रा भुक्तानीका लागि दूरसञ्चार प्राधिकरणबाट ४ अर्ब ७३ करोड रुपैयाँ बराबर सिफारिस

क्यापिटल नेपाल आइतबार, फागुन २०, २०८०

काठमाडौं। नेपाल दूरसञ्चार प्राधिकरणले एक वर्षमा ३ अर्ब ७१ करोड रुपैयाँ बढीको उपकरण आयातका लागि सिफारिस गरेको छ। प्राधिकरणले गत आर्थिक वर्ष २०७९/८०मा ३ अर्ब ७१ करोड २७ लाख ६ हजार ६ सय ८ रुपैयाँ बराबरका दूरसञ्चार सेवामा प्रयोग हुने उपकरण आयातका लागि सिफारिस गरेको हो।

दूरसञ्चार सेवा सञ्चालन, पूर्वाधार विकास तथा विस्तारका लागि आवश्यक पर्ने उपकरणहरू प्राधिकरणको सिफारिसमा सेवा प्रदायकहरूले विदेशबाट आयात गर्न पाउने व्यवस्था छ। सोहीअनुसार प्राधिकरणबाट नेपाल दूरसञ्चार कम्पनी लिमिटेड (नेपाल टेलिकम)ले एक वर्षमा १ अर्ब ४१ करोड ६५ लाख ६ हजार १८ रुपैयाँ र एनसेलले २ अर्ब २९ करोड ६२ लाख ५ सय ९० रुपैयाँ बराबरको उपकरण आयातका लागि अनुमति पाएका हुन्।

त्यस्तै, प्राधिकरणबाट ४ अर्ब ७३ करोड १४ लाख ५० हजार ९ सय ४ रुपैयाँ बराबरको विदेशी मुद्रा भुक्तानीका लागि सिफारिस गरिएको छ। प्राधिकरणबाट दूरसञ्चार सेवा सञ्चालनका लागि सेवा प्रदायकहरूले विदेशी संस्थाहरूसँग गरेको सम्झौताअनुसार विदेशी मुद्रा भुक्तानीका लागि सिफारिस हुने गरेको छ। सोहीअनुसार ४ अर्ब ७३ करोड बराबरको विदेशी मुद्रा भुक्तानीका लागि सिफारिस गरिएको प्राधिकरणले जानकारी दिएको छ।

प्राधिकरणले प्रकाशित गरेको गत आर्थिक वर्ष २०७९/८० को वार्षिक प्रतिवेदनअनुसार गत एक वर्षमा साढे ३ करोड बढी रकम सरकारको राजस्व खातामा जम्मा भएको छ। दूरसञ्चार सेवाहरुमा फ्रिक्वेन्सी प्रयोग गरी सेवा प्रदायकबाट गत वर्षमा फ्रिक्वेन्सी दस्तुरमा ३ अर्ब ५० करोड २६ लाख ७५ हजार ७ सय ८० रुपैयाँ नेपाल सरकारको राजस्व खातामा दाखिला भएको हो।

418286922_711476191172204_3615387320885136100_n-1709465005.png