जनकपुरधाममा ‘श्रमाधान रोजगार मेला’ हुँदै

रोजगार

गृहपृष्ठ
रोजगार

जनकपुरधाममा ‘श्रमाधान रोजगार मेला’ हुँदै

क्यापिटल नेपाल शनिबार, जेठ १९, २०८१

फाइल तस्बिर

धनुषा। जनकपुरधाममा आजदेखि ‘श्रमाधान रोजगार मेला’ सुरु हुँदै छ। श्रम, रोजगार तथा सामाजिक सुरक्षा मन्त्रालयको आयोजनामा मेला आयोजना गरिएको हो।

दुई दिनसम्म चल्ने मेला श्रम, रोजगार तथा सामाजिक सुरक्षा मन्त्रालय, मधेस प्रदेश र जनकपुरधाम उपमहानगरले संयुक्त रुपमा आयोजना गरेका हुन्। मेलाको नेपाल उद्योग परिसंघले संयोजन गरेको हो।

श्रम, रोजगार तथा सामाजिक सुरक्षा मन्त्रालयका उपसचिव एवं मेलाका मधेस प्रदेश संयोजक दीपेन्द्र पौडेलका अनुसार मेलामा रोजगारीसहितका कक्ष रहनेछन्। कामको खोजीमा रहेका युवाको अन्तर्वार्ता रोजगारदाताले मेलामै लिने र आवश्यक परेको जनशक्तिलाई रोजगारी अवसर दिने गरी तयारी गरिएको उनले बताए।

मेलामा श्रम तथा रोजगारसँग सम्बन्धित सरकारी निकायको कक्ष, रोजगारदाता, म्यानपावर व्यवसायी तथा विभिन्न सामाजिक संस्थालगायतका ३५ भन्दा बढी कक्ष रहनेछन्।

कामको खोजीमा रहेका युवालाई लक्षित गर्दै सीपसँग सम्बन्धित तथा रोजगारीमा जोड्ने रोजगार परामर्श स्टल तथा विभिन्न नेटवर्किङ सत्र, स्थानीय सांस्कृतिक प्रस्तुतिलगायत कार्यक्रम पनि राखिएका छन्। मेलाबाट रोजगारदाता र श्रमिकमा उत्साह थपिने अपेक्षा गरिएको छ।–रासस

प्रकाशित मिति: शनिबार, जेठ १९, २०८१ १२:१८

प्रतिक्रिया दिनुहोस्