सोडारी नेतृत्वको सरकारले ल्याएको बजेट अलपत्र, प्रतिस्थापन बजेट सार्वजनिक गर्दै सुदूरपश्चिम

अर्थतन्त्र

गृहपृष्ठ
अर्थतन्त्र

सोडारी नेतृत्वको सरकारले ल्याएको बजेट अलपत्र, प्रतिस्थापन बजेट सार्वजनिक गर्दै सुदूरपश्चिम

क्यापिटल नेपाल शुक्रबार, भदौ २१, २०८१

काठमाडौं। केन्द्रमा कांग्रेस–एमाले सत्ता चलाउन जोडिएपछि निवर्तमान मुख्यमन्त्री दीर्घबहादुर सोडारी नेतृत्वको सरकारले गत असार १ मा प्रदेशसभा प्रस्तुत गरेको चालू आव २०८१/८२ को बजेट अलपत्र परेसँगै सुदूरपश्चिम सरकारले प्रतिस्थापन बजेट ल्याउने भएको छ।

पुष्पकमल दाहाल नेतृत्वको सरकारका बेला माधव नेपालको पार्टी नेकपा एसबाट सोडारीले सुदूरपश्चिमको मुख्यमन्त्री भएका थिए। तर, समीकरण फेरिएसँगै उनलाई एमालेलगायत दलले समर्थन फिर्ता लिएपछि प्रदेशसभामा बजेट अलपत्र परेको हो।

हालका मुख्यमन्त्री कमलबहादुर शाह नेतृत्वको सरकारले परिमार्जन गरेर अर्को बजेट ल्याउन लागेको हो।

सोडारी नेतृत्वको तत्कालीन सरकारले चालू आव २०८१/८२ का लागि ३१ अर्ब ३२ करोड ९८ लाखको बजेट प्रदेशसभामा पेस गरेको थियो। यसमध्ये चालूतर्फ ११ अर्ब ७ करोड १९ लाख र पुँजीगततर्फ १७ अर्ब ५३ करोड ८ लाख छुट्याइएको थियो।

सुदूरपश्चिम प्रदेश सरकारले भदौ २५ सम्म ल्याउने तयारी थालेको चालू आर्थिक वर्ष २०८१/८२ को बजेट अब ३० अर्ब हाराहारी हुने अनुमान गरिएको छ। यसअघिको सरकारले ल्याएको बजेटलाई परिमार्जन गरेर अर्को बजेट ल्याउने तयारी अन्तिम चरणमा पुगेको आर्थिक मामिला मन्त्रालयका सचिव झलकराम अधिकारीले बताए।

तत्कालीन सरकारले ल्याएको बजेट अलपत्र परेपछि साउन १ देखि सरकारको राजस्व संकलन, खर्चलगायत ठप्प थियो। तर, शाहको नेतृत्वमा साउन २२ मा नयाँ सरकार गठनसँगै अध्यादेश ल्याएर राजस्व संकलन थालिए पनि बजेट शून्य अवस्था अझै हटेको छैन। अहिले सबै खर्च उधारोमा चलिरहेको छ।

प्रकाशित मिति: शुक्रबार, भदौ २१, २०८१ १२:१२

प्रतिक्रिया दिनुहोस्