रोजगारीका लागि उद्योग सञ्चालन हुनुपर्छ : मुख्यमन्त्री लामा

अर्थतन्त्र

गृहपृष्ठ
अर्थतन्त्र

रोजगारीका लागि उद्योग सञ्चालन हुनुपर्छ : मुख्यमन्त्री लामा

क्यापिटल नेपाल बुधबार, असोज २, २०८१

हेटौंडा । बागमती प्रदेशका मुख्यमन्त्री बहादुर सिंह लामाले रोजगारी सिर्जना गर्न उद्योग सञ्चालन हुनुपर्ने बताएका छन्। बुधबार हेटौंडामा आयोजित बागमती प्रदेश उद्योग परिसंघको तेस्रो साधारण सभालाई सम्बोधन गर्दै मुख्यमन्त्री लामाले बढ्दो बेरोजगारी दर घटाउन र युवा पलायन रोक्न रोजगारी सिर्जना अनिवार्य रहेको बताए।

'सरकारले मात्रै रोजगारी दिनसक्ने वर्तमान अवस्था छैन। सरकारले त्यसका लागि निजी क्षेत्रसँग पनि समन्वय गर्नुपर्छ। सरकार र निजी क्षेत्रबीच समन्वय नभए उद्योग सञ्चालन सम्भव छैन। उद्योग सञ्चालन नभए स्वदेशमै रोजगारी सिर्जनाको सम्भावना रहँदैन,' उनले भने।

अहिले कुनै पनि क्षेत्रबाट उद्योगलाई सर्पोट नदेखिएकाले त्यो सोचनीय विषय भएको उनको भनाइ छ। 'नेपाली लगानीकर्ता पनि विदेशमा पुगेका छन्। उद्योग कलकारखानामा लगानी कसरी भित्र्याउने भन्ने विषयमा सबैले सहकार्य गर्नुपर्छ। सरकारले उद्योग, उद्योगीको संरक्षण र संवर्द्धनमा गर्नुपर्ने भूमिकाका बारेमा छलफल गर्नुपर्छ,’ उनले भने।