नबिल बैंकको १० प्रतिशत लाभांश पारित, वासलात आकार साढे ५ खर्ब नाघ्यो

कर्पोरेट बजार

गृहपृष्ठ
कर्पोरेट बजार

नबिल बैंकको १० प्रतिशत लाभांश पारित, वासलात आकार साढे ५ खर्ब नाघ्यो

क्यापिटल नेपालबिहीबार, मंसिर २७, २०८१

काठमाडौं। नबिल बैंकले सेयरधनीलाई १० प्रतिशत नगद लाभांश वितरण गर्ने प्रस्ताव पारित गरेको छ। बैंक अध्यक्ष उपेन्द्रप्रसाद पौडेल अध्यक्षताको ४०औं वार्षिक साधारणसभाले सेयरधनीका लागि नगद लाभांश पारित गरेको हो।

साधारणसभाले सञ्चालक समितिको सिफारिस र राष्ट्र बैंकको स्वीकृतिपछि आर्थिक वर्ष २०८०/८१ सम्मको सञ्चित मुनाफाबाट सेयरधनीलाई १० प्रतिशत नगद लाभांश वितरण गर्ने प्रस्ताव पारित गरेको हो।

समीक्षा वर्ष २०८०/८१ मा बैंकले ६ अर्ब २० करोड रुपैयाँ खुद मुनाफा आर्जन गरेको थियो। गत आर्थिक वर्षको तुलनामा बैंकको निक्षेप दायित्वमा ६६ अर्ब १० करोड रुपैयाँ अर्थात् १६.४१ प्रतिशतले वृद्धि भई ४ खर्ब ६८ अर्ब ७९ करोड पुगेको छ भने कर्जा तथा सापटी ४६ अर्ब ३२ करोड अर्थात् १३.६५ प्रतिशत वृद्धि भई ३ खर्ब ८५ अर्ब ७२ करोड रुपैयाँ पुगेको छ । समग्रमा आव २०८०/८१ मा बैंकको वासलातको आकार १५.७६ प्रतिशतले वृद्धि भई ५ खर्ब ५७ अर्ब २ करोड पुगेको हो।

त्यस्तै, साधारणसभाले सञ्चालक समितिमा अनन्त पौड्याल र प्रविन टिवडेवालालाई निर्विरोध निर्वाचित गरेको छ। बैंक सञ्चालक समितिमा सर्वसाधारण सेयरधनी समूहको प्रतिनिधित्व गर्ने दुई सञ्चालक पदका लागि भएको निर्वाचनमा पौड्याल र टिवडेवाला निर्विरोध निर्वाचित भएका हुन्।

कार्यक्रममा अध्यक्ष पौडेलले बैंकले संस्थागत सुशासन र ग्राहक सन्तुष्टिलाई उच्च प्राथमिकतामा राख्दै बैंैकिङ सेवालाई आधुनिकीकरण तथा विस्तार गर्दै आएको बताए।

नबिलले विगतका वर्षमा बाँडफाँट गरेको नगद लाभांश, बजार पुँजीकरण र जेथामा भएको अभिवृद्धिअनुसार स्थापनाकालको चुक्ता पुँजी हालसम्म ९६० गुणाले वृद्धि भएको जनाएको छ। हाल बैंकले २६८ शाखा, ३२० एटिएमबाट बैंकिङ सेवा दिँदै आएको छ।

प्रकाशित मिति: बिहीबार, मंसिर २७, २०८१ १५:३६

प्रतिक्रिया दिनुहोस्