चितवनमा आठ महिनामा मरे २० वटा गैँडा

समाज

गृहपृष्ठ
समाज

चितवनमा आठ महिनामा मरे २० वटा गैँडा

क्यापिटल नेपाल मंगलबार, चैत ५, २०८१

काठमाडौं। चालु आर्थिक वर्षको आठ महिनामा २० वटा गैँडा मरेका छन्। चितवन राष्ट्रिय निकुञ्ज तथा यस आसपासका क्षेत्रमा ती गैँडा मरेका हुन्।

निकुञ्जका सूचना अधिकारी अविनाश थापा मगरले गैँडाहरु प्राकृतिक कारणले मरेको दाबी गरेका छन्। बाघ तथा गोहीको आक्रमणमा परेर, एकापसमा जुधेर, बिरामी भएर, दलदलमा फसेर र बुढो भएर मरेको उनको भनाइ छ।

यस आर्थिक वर्षमा चोरी–सिकारीका कारण भने गैँडा नमरेको उनले जानकारी दिए। गत आर्थिक वर्षमा २१ वटा गैँडा मरेका थिए । मरेका गैँडामध्ये १८ वटा प्राकृतिक कारणले हो भने दुईवटा चोरी–सिकारीले र एउटाको कारण खुल्न नसकेको उनले बताए।

मगरका अनुसार आर्थिक वर्ष २०७९/८० मा चितवन राष्ट्रिय निकुञ्जमा २२ वटा गैँडा मरेका थिए। जसमध्ये २० वटा कालगतिले, एउटा विद्युतीय करेन्टबाट र एउटा चोरी–सिकारीले मारेका थिए। प्राकृतिक कारणले धेरै गैँडा मरेपछि वन तथा वातावरण मन्त्रालयले मृत्युको कारण खोजी गर्न समिति बनाएको थियो। पछिल्ला वर्षहरुमा प्राकृतिक कारणबाट हुने गैँडाको मृत्युदर घट्दै आएको छ। आव २०७५/७६ मा प्राकृतिक कारणले मात्र ४३ गैँडा मरेका थिए। त्यसपछिका वर्षहरुमा प्राकृतिक कारणले हुने मृत्युदर घट्दै आएको छ।

सन् २०२१ को गणनाअनुसार नेपालमा गैँडाको सङ्ख्या ७५२ रहेको छ। एकसिङ्गे गैँडाको सङ्ख्या सबैभन्दा बढी चितवन राष्ट्रिय निकुञ्जमा ६९४ रहेको छ। बर्दियामा ३८, शुक्लाफाँटामा १८ र पर्सामा तीन गैँडा रहेको तथ्याङ्क छ।

प्रकाशित मिति: मंगलबार, चैत ५, २०८१ १२:४८

प्रतिक्रिया दिनुहोस्