काठमाडौं। पोखरा महानगरपालिकाले नगरप्रहरीलाई प्रभावकारी सञ्चारका लागि वाकिटकी उपलब्ध गराएको छ। महानगरका अनुसार हाललाई जीएसएम बाट चल्ने १० वटा पिओसी वाकिटकी उपलब्ध गराइएको छ।
पोखरा महानगरले आह्वान गरेको बोलपत्र प्रक्रियामार्फत आइटेल नेटवर्क प्रालिले प्रक्रियापछि वाकिटकी उपलब्ध गराएको हो।
वाकिटकीको उपलब्धतासँगै सञ्चारमा ठूलो सहयोग पुगेको पोखरा महानगरका नगरप्रहरी पुरुषोत्तम थापा मगरले बताए। “हाम्रो अधिकांश काम फिल्डमै हुन्छ,त्यसका लागि पहिले मोबाइललगायतको भर पर्नुपर्ने अवस्था थियो,केही दिनअघि वाकिटकी आएपछि कुराकानी गर्न,निर्देशन दिन र काम गर्न सहज भएको छ”, उनले भने।
उनका अनुसार वाकिटकीको प्रयोगमार्फत सुरक्षा व्यवस्थापनमा थप सहयोग पुगेको छ। नेपाल टेलिकमको नेटवर्कबाट चल्ने भएकाले दूरीको हिसाबले पनि कुनै समस्या नभएको उनले बताए।
पिओसी वावाकिटकीमा मुख्य कार्यालयमा राखिने कन्टेल सफ्टवेयर बाट सामुहिक तथा व्यक्तिगत रुपमा कुराकानी गर्न,कुराकानीलाई रेकर्डमा राख्न र सुन्न,जिपिएस लोकेसन ट्रयाकिङ गर्नका साथै केन्द्रबाटै नियन्त्रण गर्नका लागि सहज भएको छ। यसले नगरप्रहरीको कामलाई सहज बनाएको उनको भनाइ छ।
एबेल ब्राण्डको पिओएस वाकिटकीको आधिकारिक बिक्री वितरक डिकेड इन्टरनेशलनले नेपाल दूरसञ्चार प्राधिकरणबाट टाइप अप्रुभल प्रमाणपत्र प्राप्त गरी नेपाल टेलिकम तथा एनसेलको आईओटी सिम प्रयोग गरी सञ्चारसेवा दिइरहेको छ। साथै प्रत्येक आइएमइआई नम्बर नेपाल दूरसञ्चार प्राधिकरणबाट प्रमाणित गरिने आइटेल नेटवर्कका निर्देशक बिनु भण्डारीले जानकारी दिइन्।
